बुटवलय् नेवाः बारे अन्तर्क्रिया
येँ (सन्ध्या टाइम्स)/नेवाः देय् दबूया नायः नरेश ताम्रकारं देय्न्यंकं च्वंपिं नेवाःतय् संरक्षण व विकासया लागिं हे नेवाः स्वायत्त राज्य नीस्वनेमाःगु बिचाः प्वंकादीगु दु। बुटवलया देवीघाटय् म्हिगः जूगु 'स्वनिगलं पिने च्वंपिं नेवाःतय् अवस्था' विषयक अन्तर्क्रिया ज्याझ्वलय् मूपाहांया थासं न्ववायेगु झ्वलय् उगु बिचाः प्वंकादीगु खः। वय्कलं स्वायत्त राज्य दुसा जक स्वायत्त राज्यया लिधंसाय् पिनेच्वंपिं नेवाःतय्सं थःगु अधिकार संरक्षणया निंतिं सः थ्वयेके फइगु खँ नं कनादिल ।
श्री नेवाः पुचः बुटवलया ग्वसालय् उगु ज्याझ्वः जूगु खः। देवीघाटय् जूगु ज्याझ्वलय् बुटवल नगरपालिकाया पुलांम्ह उपमेयर विमलबहादुर शाक्य व श्री नेवाः पुचःया न्वकु विष्णबहादुर शाक्यपिंसं न्ववानादीगु खःसा विजय श्रेष्ठं 'स्वनिगलं पिने च्वंपिं नेवाःतय् अवस्था' विषयय् ज्यापौ न्ह्यब्वयादीगु खः। येँनं वंगु नायः व मूछ्याञ्जे सहितया पुचलं नेवाः पुचः नारायणगढ थ्यंकाः नेवाः स्वायत्त राज्यया बारे अन नं अन्तर्क्रिया ज्याझ्वः याःगु खः ।
