मेम्ह नं छम्ह मधेशी नेता स्यात

धनुषाय् थौं सुथय् प्रहरी व तराई लागाय् सशस्त्र आन्दोलन याना वयाच्वंगु पुचःया दथुइ जूगु ल्वापुइ लानाः तराई राष्ट्रिय मुक्ति सेनाया पूर्व कमान्डर आकाश त्यागी धाइम्ह (राम यादव) सीगु दु। थौं सुथय् ४ बजे जनकपुरया भ्रमरपुरय् गस्तीइ वनाच्वंगु प्रहरी पुचःयात सशस्त्र पुचलं गोलीं कयेकेवं निगू पुचः दथुइ दोहोरो गोली हानाहान जूगु खः। उकी लानाः त्यागी सीगु खँ प्रहरीं धाःगु दु। प्रहरीया कथं मेगु छगू पुचः धाःसा बिसिउँ वनेत सफल जूगु दु। प्रहरीं घटना जूगु थासं सिक्सर पेस्तोल छपु, चन्दा रसिद व मुक्ति सेनाया लेटरप्याड बरामद याःगु दु। थ्व स्वयां न्ह्यः प्रहरी कार्वाहीइ लानाः सशस्त्र मधेशी मुक्ति टाइगर्स सिराहा इन्चार्ज परशुराम यादव व मधेशी राष्ट्र जनतान्त्रिक पार्टी (क्रान्तिकारी) या मेनेजर महतो प्रहरी कारवाहीइ लानाः सीगु खः ।