नेप्से कुहां वन
येँ (सन्ध्या टाइम्स)/छन्हु न्ह्यःया कारोबारय् दक्वं समूहया परिसूचक थहां वंगु नेप्से म्हिगःया कारोबारं धाःसा कुहां वःगु दु। थुगु वाःया न्हापांगु दिं नं नेप्से कुहां वःगु खःसा वयां कन्हय् कुन्हुया कारोबारय् दक्वं समूह थहां वंगु खः। तर म्हिगः हाकनं दक्वं समूहया परिसुचक कुहां वःगु दु। नेप्से म्हिगः १ दशमलव शून्य ५ अंकं कुहां वयां ७३७ दशमलव ९७ अंकय् थ्यन। अथे हे सेन्सेटिभ शून्य दशमलव ४८व फ्लोट शून्य दशमलव १३ अंकं कहां वःगु दु ।
म्हिगः नेप्से कुहां वयेगुली जलविद्युत समूहया मुख्य भूमिका जुल। थुगु समूह २० दशमलव शून्य १ अंकं (१ दशमलव ९९ प्रतिशतं) कुहां वयाः ९८७ दशमलव ६९ अंकय् थ्यंगु दु। अथे हे फाइनान्स समूह ३ दशमलव ६९ अंकं कुहां वयाः ६९५ दशमलव ८७ अंकय् व वाणिज्य बैंक समूह शून्य दशमलव ३५ अंकं कुहां वयाः ७७७ दशमलव ७५ अंकय. थ्यंगु दु ।
म्हिगःया कारोबारय् थहां वंगु छगू जक उपसूचक विकास बैंक समूह खः। विकास बैंक समूह १ दशलमव ५९ अंकं थहां वनाः ७५३ दशमलव ३६ अंकय् थ्यंगु दु ।
नेप्से म्हिगःया कारोबारय् कुहां वंसां ताः ईलिपा कारोबार कम्पनीया ल्याः थहां वंसां सन्तोषजनक कारोबार धाःसा मजुल। झण्डै बछि धइथें कम्पनी द्यापं फयेमाःगु दु। म्हिगः ख्वीगू कम्पनीया कारोबार जुल। उकी मध्यय् कास्की फाइनान्स कम्पनीया शेयरधनीतय्सं प्रति कित्ता शेयरय् ३२/- तका दां लबः कायेत ताःलाःगु दुसा चिलिमे हाइड्रो पावर कम्पनीया शेयरधनीतय्सं प्रति कित्ताय् ६०/- दां द्यापं फयेमाल ।
नेप्सेय् म्हिगः छगू लाख स्वीखुद्वः न्यासः व नीनिगू कित्ता शेयर न्याये-मी जुयाः च्यागू करोड न्हय्प्यंगू लाख व स्वीनिद्वः तका दांया कारोबार जुल। म्हिगः नविल बैंक लिमिटेडं दकलय् अप्वः शेयर कारोबार याःगु दु। अन्नपूर्ण विकास बैंक दकलय् अप्वः कमे याःगु कम्पनी जूगु दुसा चिलिमे हाइड्रो पावर कम्पनी दकलये अप्वः गुमे याःगु दु ।
