माइक्रोबस व्यवसायीतय्सं प्रदर्शन
नेविसंघया कार्यकर्तातय्सं मंगलवाः जमलय् माइक्रोबस च्याकाः ब्यूगु विरोधय् व्यवसायस्तय्सं येँय् जिल्ला प्रशासन ज्याथू न्ह्यने नाराबाजी यासें प्रदर्शन याःगु दु ।
व्यवसायीतयसं घटनाय् संलग्न जुपिं दोषितय्त कारबाही यायेमाःगु व च्याकूगु माइक्रोबस थुवायात क्षतिपूर्ति बीमाःगु माग याःगु दु । थःपिनि माग पूमवंसाः व्यवसायीतय्सं कडा आन्दोलनय यायेगु ख्याच्वः ब्यूगु दु ।
व्यवसायीतय्सं थःगु मागत न्ह्यथंनाः प्रमुख जिल्ला अधिकारीयात ज्ञापनपौ नं लःल्हाःगु दु । प्रहरीं घटनाय् संलग्न झिंम्हेसित ज्वनेधुंकूगु दुसाः प्यम्हेसिया पहिचान जूगु व मेपिं खुम्हेसित धाःसा त्वतुगु दु ।
नेविसंघया कार्यकर्तातय्सं सोमवाः बानेश्वरय् थः कार्यकर्ता वीरेन्द्र गिरीयात अज्ञात पुचःलं खुकुरी प्रहार याःगु धासें मंगलवाः त्रिचन्द्र क्याम्पस न्ह्यने प्रदर्शन याःगु खः । प्रदर्शनया झ्वलय् जमल-बढानिलकण्ठ रुटय् चलेजुइगु बा. २. ख. २२९८ नम्बरया माइक्रोबस च्याकाः ब्यूगु खः ।
