शताब्दीया हे दकलय् ताःहाकःगु सूर्यग्रहण
शताब्दीया दकलय् ता:हाकःगु सूर्यग्रहण बुधवाः सुथय् नेपाः लगायत एसियाया छुंछुं देय्तयसं स्वयेगु ह्वताः चूलाकूगु दु । २१औं शताब्दीया दकलय् ता:हाकःगु सूर्यग्रहण नेपालय् सुथय् ५:४६ सुरु जुया ७:४८ सिधःगु खः ।
नेपालय् स्वनिगः नापं सिराहा, सप्तरी, उदयपुर, धनकुटा, सुनसरी, मोरङ, झापा, इलाम, पाञ्चथर लगायत पूर्वी शहरं नं सूर्यग्रहण खनेदुगु खः । नेपाः लगायत एसियाया भारत, चीन, बंगलादेश, भुटान, बर्मा व जापनय् नं थ्व खग्रास सूर्यग्रहण खनेदुगु खः ।
ग्रहण भारतया पश्चिम तटं सुरु जुया नेपाः, बंगलादेश, भुटान, बर्मा, चीन व जापन जुया रेक्युक्यु द्वीप जुया प्रशान्त महासागरय् थ्यंकाः सिधःगु खः । थ्व ग्रहण नेपालय् दकलय् ताःहाक इलामं ४ मिनेट ७ सेकेन्ड खनेदुगु खसाः हनिमय् दकलय् ताःहाक जापनय् खनेदुगु खः । थन झण्डै ७ मिनेट तक सूर्यग्रहण खनेदुगु खः ।
सूर्यग्रहण स्वयेगु व्यवस्था येँय् नेपाल विज्ञान व प्रविधि प्रतिष्ठान (नास्ट), तक्षशिला एकेडेमी, बाल्मिकी विद्यापिठ आदि थासय् यानातःगु खसाः अन तधंगु ल्याख्य् दर्शकतय् भीड जूगु खः । अथेहे प्रधानमन्त्री माधवकुमार नेपालं नास्टय् वनाः सूर्य ग्रहण अवलोकन यानदीगु खः ।
थ्वस्वयां न्ह्यः सन् १८९८ जनवरी २२य् थंज्याःगु हे सूर्यग्रहण जूगु खसाः आः १ सय ३१ वर्ष लिपा सन् २१३२ जुनय् जक थंज्याःगु सूर्यग्रहण स्वये खनीगु जूगु दु ।
