इजिप्ट भ्रमण बारे प्रधानमन्त्रीं राष्ट्रपतियात जानकारी
प्रधानमन्त्री माधवकुमार नेपालं थःगु इजिप्ट भ्रमणया बारे राष्ट्रपति डा. रामवरण यादवयात जानकारी बियादीगु दु ।
मंगलवाः राष्ट्रपति भवन शितल निवास वनाः प्रधानमन्त्री नेपालं इजिप्टय् जूगु झिंन्याक्वःगु असंलग्न राष्ट्रतय् शिखर सम्मेलनय् नेपाःया सहभागितया बारे विस्तृत जानकारी बियादीगु खः । अथेहे प्रधानमन्त्री नेपालं झाडापखाला नियन्त्रणया निंतिं जुयाच्वंगु कुतःया बारे व सोमवाः प्रधानमन्त्री स्वयमं झाडापखाला प्रभावित क्षेत्रया निरिक्षण भ्रमण यानादीगु बारे नं राष्ट्रपतियात जानकारी बियादीगु खः ।
खँल्हाबंलाय् राष्ट्रपति यादवं सैनिक ऐन, सेना समायोजन, लोक सेवा आयोग, मध्यपश्चिमया जुयाच्वंगु झाडापखालाया समस्या लगायतया बारे प्रधानमन्त्री नेपाल समक्ष च्यूता प्वंकादीगु खः । यादवं अन्तरिम संविधान कथं सैनिक ऐन अद्यावधिक यायेत प्रधानमन्त्रीयात सुझाव बियादीगु खः । अथेहे वयेकलं संविधान निर्माण प्रकृयाय् सिथिलता खनेदुगुलिं नं च्यूता प्वंकादीगु खः ।
