संविधानसभाया बैठक अनिश्चितकालया निंतिं स्थगित
विषयगत समितितय्सं ईलय् हे अवधारणा लःल्हाये मफेवं संविधानसभाया बैठक मंगलवाः नं निसें अनिश्चितकालया तकया निंतिं स्थगित जूगु दु ।
थीथी प्यंगू समितिया अवधारणालय् संविधानसभाया बैठकय् सहलह जुइधुंकाः नं ल्यंदुगु न्ह्यगू विषयगत समितिं मस्यौदा तयार यायेमफेवं संविधानसभाया बैठक प्रभावित जूगु खः । संविधानसभाय् मुक्कं झिंछगू विषयगत समितित दु ।
संविधानसभा सचिवालयया प्रवक्ता मुकुन्द शर्मां तत्काल छुं नं समितिया अवधारणा व मस्यौदा संविधानसभाय् न्ह्ब्वयेगु मफुगुलिं बैठक स्थगित यायेमाःगु खँ धयादीगु दु ।
संविधानसभा मार्फत न्हूगु संविधान निर्माण यायेत झिलाः जक ल्यं दनिवलय् संविधान निर्माणया कार्यतालिका न्यक्वः तक संशोधन जुइधुंकूगु दु । नापं विषयगत समितितय्सं ईलय् हे मस्यौदा लःल्हाये मफुगुलिं तक्वःमच्छि हे संविधानसभाया बैठक स्थगित जुइधुंकूगु दु ।
अथेहे न्यान्हू न्ह्यः निसें न्ह्यानाच्वंगु संवैधानिक निकायया संरचना निर्धारण समितिया सहलह मंगलवाः क्वचाःगु दु ।
