नेपाःपाखें म्येय्या ला चीनपाखे निर्यात
येँ (सन्ध्या टाइम्स)/नेपालं चीनय् म्येय्या ला निर्यात जुयाच्वंगुलिं थन लाया भाः थहां वंगु खँ सम्बन्धित व्यापारीतय्सं धाःगु दु ।
ताः इलंनिसें लाया व्यापार याना वयाच्वंम्ह न्हुच्छेरत्न खड्गी (वामन दाई) या कथं थौंकन्हय् नेपालं न्हिं ७० निसें ८० म्ह म्येय्या ला चिनियाँ व्यापारीतय्सं यंकाच्वंगु दु ।
वय्कलं कनादी कथं छखे भारतं न्हापा थें म्येय् वयेगु म्हो जुयाच्वंगु दुसा मेखे चिनियाँ व्यापारीतय्सं थनं चीनय् ला यंकाच्वंगुलिं माग स्वयां आपूर्ति म्हो जूगुलिं लाया भाः थहां वंगु खः ।
थौंकन्हय् भारतय् हे म्येय् स्यायेगु आपालं वधशाला चाले धुंकूगुलिं नेपालय् स्वस्थ म्येय् वयेगु म्हो जुयाच्वंगु दु।
भारतय् वधशाला दयेकेधुंकाः नेपालय् म्येय् निर्यात यायेगु ज्याय् छगू कथं प्रतिबन्ध हे तयातःगु जानकारी नं वय्कलं बियादिल ।
थौंकन्हय् नेपालय् वयाच्वंगु म्येय् धइगु भन्सार छले यानाः अवैध रुपं वयाच्वंगु जक खः, थ्व बाहेक मेगु म्येय् वयेगु बन्द जुइधुंकूगु दु ।
मेम्ह व्यापारी इन्द्रप्रसाद खड्गीया कथं भारतय् जक सन् २००१ निसें २००९ तक १४ गू वधशाला चालेधुंकूगु दु। न्हापा न्हापा भारतं नेपालय् पंजाबी म्येय् वयेगु यानाच्वंगु खःसा आः अज्याःपिं म्येय् मवयेधुंकूगु जानकारी बिसें पंजाबी म्येय् छम्हेसिया ला हे ३०० निसें ४०० किलो तक दइगु खँ नं वय्कलं कनादिल ।
तर वय्कलं चीनय् म्येय्या ला आपूर्ति जूगुलिं हे जक लाया भाः थहां वंगु खँ धाःसा अस्वीकार यानादिल। 'नेपालं छगू निगू टन ला चाइना वनेवं झीत खास हे लिच्वः लाइ मखु', वय्कलं धयादी ।
तर उखे न्हुच्छेरत्न खड्गीया तर्क धाःसा मेगु हे दु। वय्कःया कथं छखे नेपाःया बजारय् हे आपूर्ति याये मफयाच्वंगु इलय् चीनय् निर्यात जुइगुलिं नेपाःया बजारय् बांमलाक लिच्वः लाइगु स्वाभाविक खः ।
वय्कःया कथं थौंकन्हय् नेपालय् गुलि नं म्येय् स्याइ उकिया फुक्कं सःपू चिनियाँतय्सं यंकाच्वंगु दु। अले छफ्वः सःपूया ३ किलोया ल्याखं हिसाब यायेगु खःसा न्हिं १२०० किलो ला चाइनाय् वनाच्वंगु दु। दैनिक १२०० किलो ला पिने वनेगु धइगु नेपाःया बजाःयात तप्यंक लिच्वः लाकेगु ज्या हे खः धकाः वय्कलं दाबी यानादी ।
