ग्वःगू आयोग दयेकेगु धइगु अन्यौल
येँ (सन्ध्या टाइम्स)/संविधानसभाय् संवैधानिक निकायया स्वरुप निर्धारण समितिं न्ह्यब्वःगु सुझावयात कयाः थौं दकलय् लिपा सहलह जुइत्यंगु दु ।
वंगु प्यन्हु न्ह्यवंनिसें समितिं बिउगु प्रतिवेदनयात कयाः सहलह जुयाच्वंसां ग्वःगू संवैधानिक आयोग दयेकेगु धइगु बारे धाःसा दलतय् दथुइ छगू मत जुइ फयाच्वंगु मदु। थीथी राजनीतिक पार्टीतपाखें बिस्कं बिस्कं सुझाव वयाच्वंगुलिं ग्वःगू आयोग दयेकेगु धइगु बारे निष्कर्ष पिकाये मफयाच्वंगु खँ सीदुगु दु ।
संविधानसभाय् थुकिया बारे ठोस निष्कर्ष पिहां मवयेवं उगु सुझावयात आः सुझाव संकलन अध्ययन समितिइ छ्वयेगु तयारी जुयाच्वंगु दु ।
आपालं समितिइ थुकथं विवाद जुयाः छगू मत जुइ मफयाच्वंगुलिं संविधान दयेकेगु ज्याय् लिच्वः लाइगु सम्भावना वयाच्वंगु खँ विज्ञतय्सं धाःगु दु ।
