कारोबार कुहां वंसा नेप्से थहां वन
येँ (सन्ध्या टाइम्स)/नेपाल स्टक एक्सचेन्जय् म्हिगःया कारोबारय् नं नेप्से परिसूचकया नापं कारोबार जूगु दक्वं समूहया परिसूचकत थहां वंगु दु। नेप्से म्हिगःया कारोबारं ४ दशमलव ६८ अंकं थहां वनाः ७३९ दशमलव शून्य २ अंकय् थ्यंगु दु। अथे हे सेन्सेटिभ १ दशमलव शून्य ६ अंकं थहां वंगु दुसा लोट नं शून्य दशमलव ४४ अंकं थहां वन ।
म्हिगःया कारोबारय् परिसूचकत थहां वंसां उपसूचकया कारोबारय् धाःसा उलि प्रगति जूगु खनेमंत। नेप्से अप्वः प्रभाव लाकीगु वाणिज्य बैंक समूहया उपसूचक ६ दशमलव ४८ अंकं थहां वनाः ७७८ दशमलव १ अंक थ्यंगु दुसा विकास बैंक समूहया उपसूचक ३ दशमलव २४ अंकं थहां वनाः ७५१ दशमलव ७७ अंक थ्यंगु दु। फाइनान्स समूह ३ दशमलव १३ अंकं थहां वनाः ६९९ दशमलव ५६ अंक थ्यंगु दु ।
म्हिगःया कारोबारय् व्यापारिक, जलविद्युत व विमा समूहया उपसूचकत धाःसा कुहां वःगु दु। व्यापारिक समूह ५ दशमलव ४८ अंकं कुहां वयाः २९० दशमलव ३५ अंकय् थ्यंगु दु। जलविद्युत समूह १० दशमलव ९१ अंकं कुहां वयाः १००७ दशमलव ७ अंकय् थ्यंगु दुसा विमा समूह ५ दशमलव ५६ अंकं कुहां वयेवं ६५१ दशमलव ८९ अंकय् थ्यन।
म्हिगः न्यय्च्यागू कम्पनीया १ लाख ७० हजार ३३९ कित्ता शेयर न्याये-मी जुयाः ८ करोड ९६ लाख ६५ हजार दांया कारोबार जुल। कारोबार जूगुकम्पनीत मध्ये हिमालयन बैंक लिमिटेडया शेयरधनीतय्सं प्रति कित्ता शेयरय् ४९/- तका लबः काःगु दुसा विशाल बजार कम्पनी लिमिटेडया शेयरधनीतय्सं प्रति कित्ता शेयरय् ६४/- दां द्यापं फयेमाःगु दु।
म्हिगःया शेयर बजारय् नविल बैंक लिमिटेडं दकलय् अप्वः कारोबार याःगु दु। अथे हे नेपाल बङ्गलादेश बैंकं दकलय् अप्वः कमे याःगु दुसा एस डेभलपमेण्ट बैंक लिमिटेडं दकलय् गुमे याःगु दु ।
