जातीय राजनीति एकताया निंतिं बाधक : कोइराला

नेपाली कांग्रेसया सभापति गिरिजाप्रसाद कोइरालां जातीय अधारया राजनीतिं देशय् तःधंगु दुर्घटना जुइफुगु धासें थ्व एकताया निंतिं बाधक जूगु धयादीगु दु ।

नीन्ह्यक्वःगु वीपि स्मृति दिवसया लसताय् मंगलवाः येँय् नेपाल ट्रेड युनियन कांग्रेस स्वतन्त्र राष्ट्रिय समितिं याःगु अन्तक्रिया ज्याझ्वलय् सभापति कोइरालां जातीय राजनीति गबलें नं देय्या हितया निंतिं जुइमफइगु धयादिल । वयेकलं वर्गया आधारय् राजनीति यायेमाःगु धासें वर्गीय आन्दोलनया निंतिं वीपिं नालाकाःगु नीति आः नं उलि हे सान्दर्भिक जूगु धयादिल ।

मंगलवाः हे कांग्रेस पार्टी ज्याकू सानेपाय् जूगु ज्याझ्वलय् कोइरालां वीपिया एकता व राष्ट्रिय मेलमिलापया नीति पाखें एक इन्च नं ल्यूने सरे मजुइगु दाबी यानादिल ।