सरकर जनतापाखें तिरस्कृत : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' सरकार जनता पाखें तिरस्कृत जूगु धासें वर्तमान सरकार साम्राज्यवादीया ईशाराय् चलेजुयाच्वंगु द्वपं बियादीगु दु ।
सोमवाः येँय् 'रातो झिल्को' पत्रिकाया उल्लेज्या व 'थौंया मार्क्सवाद' विषयस बहस ज्याझ्वलय् अध्यक्ष प्रचण्डं मार्क्सया सिद्धान्तय् विश्वास याइगु निगू पार्टीया बिचाः नं फरक फरक खनेदुगु धयादिल । वयेकलं एमालेयात लक्षित यासें छगू पार्टी नागरिक सर्वोच्चताया पक्ष व मेगू विपक्षय् दनाच्वंगु धयादिल ।
वयेकलं गुगु साम्राज्यवादीं वामपन्थीतय्त टुक्रा यायेगु कुतः यानाच्वंगु दु, वयाः हे ईशाराय् वामपन्थीत हे लगे जूगु द्वपं बियादिल । वयेकलं वर्तमान सरकार वामपन्थीया नेतृत्वय् दुसां मार्क्सवादया भावना विपरित जूगु धयादिल ।
अथेहे ज्याझ्वलय् एमालेया अध्यक्ष झलनाथ खनालं देशभक्त शक्तित छप्पँ जुइमाः धयादिल । वयेकलं साम्राज्यवादी व यथास्थितिवादी शक्तित विरुद्ध देशभक्त शक्तित छप्पँ जुइमाः धयादिल । अध्यक्ष खनालं संविधानसभाय् दुपिं दक्वं दलत जनाधार स्वयां पिने वनेमज्यूगु धासें थुकीया निंतिं जनदबाब आवश्यक जूगु धयादिल ।
ज्याझ्वलय् एमाले अध्यक्ष प्रधान अर्न्तविरोध व शत्रुया पहिचान यानाः कार्यनीति व कार्यदिशां समाजयात रुपान्तरण यायेगु हे मार्क्सवाद जूगु धयादिल ।
अथेहे ज्याझ्वलय् प्राध्यापक माणिकलाल श्रेष्ठं मार्क्सवादं बाहेक समाज परिवर्तन असम्भव जूगु धयादिल । वयेकलं पुँजीवादीतय् नं सर्वहारावादीतय्सं नेतृत्व यानाः वनेगु ई वःगु धयादिल ।
