तामसालिङयात वार्ताय् वयेत सरकारया इनाप
सरकारं आन्दोलनरत तामसालिङ संघर्ष समितियात आन्दोलनया ज्याझ्वः स्थगित यानाः वार्ताय् वयेत इनाप याःगु दु । शान्ति व पुननिर्माण मन्त्रालयं सोमवाः छगू विज्ञप्ति पिथंसें वार्ता व सम्वादया माध्यमपाखें देय्या विद्यमान समस्याया समाधान यायेफइगु धासें समितियात वार्ताय् वयेत इनाप याःगु दु । सरकारं पिथंगु विज्ञप्तिइ वार्ता व सम्वादया निंतिं सरकारं उपयुक्त वातावरण यायेत सरकार प्रतिबद्ध दुगु खँ न्ह्यथंनातःगु दु ।
ताम्सालिङ स्वायत्त संघर्ष समितिं झिंगुंगू बुँदे माग तया: सोमवा: पासाङ ल्हामु राजमार्ग बन्दया यायेवं सरकारं वार्ताय् वयेत इनाप या:गु ख: । ताम्सालिङ रिङ्गरोड निर्माण यायेत वर्तमान सरकारं बजेट विनियोजन मयाः धासें संयुक्त संघर्ष समितिं थौं पासाङ ल्हामु राजमार्ग अन्तर्गत नुवाकोट व रसुवा जिल्लाय् यातायात ठप्प याना बिउगु खः ।
अथेहे बन्दया ईलय् येँ नं बन्द क्षेत्र वनेगु व अनं येँय् वयेत्यंगु सवारी साधणय् प्रदर्शनकारीतय्सं बालाजु क्षेत्रय् तोडफोड व मी च्याकेगु कुताःया वलय् प्रहरीं स्थानीयवासीतय् ग्वाहालि प्रदर्शनकारीतय्त ज्वंगु खः । अन च्वनाः प्रदर्शन यानाच्वंपिं १६ म्हेसित प्रहरीं ज्वना यंकूगु ख: ।
अथेहे बालाजुया अष्टनारायण हल न्ह्यःने च्वनाच्वंपिं छगू पुचलं याःगु आक्रमणय् लानाः माओवादी सभासद् प्रेम तामाङ व सन्तमाया तामाङ घाःपाः जूगु खः । गम्भीर घाःपाः जूम्ह प्रेम तामाङयात शिक्षण अस्पतालय् वासः याकातःगु दु ।
