गण्डकय् लः बीत भारत तयार
येँ (सन्ध्या टाइम्स)/गण्डक नहरय् भारतीय पक्षं लः मत्वःतेवं बारा, पर्सा व रौतहटया स्वंगू जिल्लाया किसानत प्रभावित जुइवं नारायणी सिंचाइ व्यवस्थापन डिभिजनया प्रमुख सीताराम यादवया पहलय् भारतया अधिकारीतलिसे जूगु वार्ता सकारात्मक जूगु दु। नेपाःया भारतया दथुइ सन् १९७३ य् जूगु सम्झौता कथं नेपाःयात भारतं ८५१ क्यूसेट लः बीमाःगु खःसां नं वंगु निवाः न्ह्यःनिसें भारतीय पक्षं लःमत्वःतेवं नेपाःया कृषकत मारय् लानाच्वंगु खः।
भारतीय पक्षं लः मबिवं स्थानीय जनता व भारतीय जनताया दथुइ तनाव ब्वलंगु खःसा उकियात कयाः निगू देया अधिकारीतय् बैठक च्वंगु खः ।
बैठकय् सम्झौता कथं भारतं लः बीगु, भारतीय पक्षं लः मबिउगु इलय् ब्वलनीगु विवादयात स्थानीय प्रहरीं नियन्त्रण यायेगु, सम्झौता कथं भारतीय पक्षं स्केप मर्मत यायेगु, लःया बहाब म्हो जूगु इलय् निगुलिं देया उच्च अधिकारीतय्त जानकारी बीगु आदि बुँदाय् सहमति जूगु खँ कार्यालय प्रमुख यादवं कनादीगु दु ।
थ्व स्वयां न्ह्यः नं भारतीय पक्षं नेपाःया भूभाग लः छ्वयेगु बन्द याना बीगु यानाच्वंगु खःसा उकिया कारणं नेपाःया आपालं कृषि योग्य भूभागय् लः मदया बुँज्याय् तकं प्रभावित जुयाच्वंगु खँ स्थानीय नेपाःया जनतां धाःगु दु ।
