सशस्त्र पुचःया मेम्ह नेता स्यात
येँ (सन्ध्या टाइम्स)/ मधेशी मुक्ति टाइगर्स सिराहा जिल्ला इन्चार्ज परशुराम यादव थौं सुथय् प्रहरी कारवाहीइ लानाः सित । येँनं ज्वंम्ह यादवयात सिराहा यंकेगु झ्वलय् अनया बन्दीपुर कमलानदी धाःथाय् बिसिउँ वनेत स्वयेवं प्रहरीं कयेकूगु गोलीं लानाः सीगु खँ धाःगु दु ।
यादवयात प्रहरीं येँय् थीथी आपराधिक ज्याय् संलग्न धकाः ल्वाभः सहित ज्वंगु खः। तर वयाके गज्याःगु ल्वाभः दुगु खः धइगु खँ धाःसा प्रहरीं धाःगु मदु ।
म्हिगः जक प्रहरीं मधेश राष्ट्र जनतान्त्रिक पार्टी (क्रान्तिकारी) या अध्यक्ष मेनेजर महतो धाइम्ह रामनारायण महतोयात गोलीं कयेकाः स्याःगु खः ।
म्हिगःया घटनाय् गस्ती वनाच्वंगु प्रहरीयात महतो सहित वःपिंसं गोलीं कयेकेवं जवाफी फायर यायेगु झ्वलय् महतो सीगु धाःसां नं पार्टीं धाःसा प्रहरीं ज्वनेधुंकाः स्याःगु द्वपं बिउगु दु ।
यादवयात नं प्रहरीं इन्काउन्टरय् लाकाः स्याःगु नुमान थन यानाहःगु दु ।
