तामाङतय् बन्दय् सभासद् घाःपाः
येँ (सन्ध्या टाइम्स)/ताम्सालिङ स्वायत्त संघर्ष समितिं आह्वान याःगु पासाङ ल्हामु राजमार्ग बन्दया झ्वलय् थौं रसुवा व नुवाकोटया सभासदतय्त छगू पुचलं आक्रमण याःगु दु। बालाजुया अष्टनारायण हल न्ह्यःने च्वनाच्वंपिं छगू पुचलं याःगु आक्रमणय् लानाः माओवादी सभासद् प्रेम तामाङ व सन्तमाया तामाङ घाःपाः जूगु खः ।
गम्भीर घाःपाः जूम्ह प्रेम तामाङयात शिक्षण अस्पतालय् वासः याकातःगु दु ।
ताम्सालिङ रिङ्गरोड निर्माण यायेत वर्तमान सरकारं बजेट विनियोजन मयाः धासें संयुक्त संघर्ष समितिं थौं पासाङ ल्हामु राजमार्ग अन्तर्गत नुवाकोट व रसुवा जिल्लाय् यातायात ठप्प याना बिउगु खः ।
बालाजुइ च्वनाः प्रदर्शन यानाच्वंपिं १६ म्हेसित प्रहरीं ज्वना यंकूगु दु। बन्दकर्तातय्सं निगः गाडी तोडफोड याना बिउगु दु। ग्वसाः खलकं भाद्र १ गते स्वनिगः बन्दया आह्वान यानातःगु दु ।
