प्रधानमन्त्री झाडापखाला प्रभावित क्षेत्रय्
प्रधानमन्त्री माधवकुमार नेपालं झाडापखाला प्रकोप नियन्त्रणया निंतिं छुं कसर मत्वतीगु खँ धयादीगु दु ।
मध्यपश्चिमया झाडापखाला प्रभावित जिल्लात जाजरकोट व रुकुमया थीथी क्षेत्र निरिक्षण भ्रमणया झ्वलय् सोमवाः सुथय् रुकुमया सदरमुकाम मुसिकोटय् ग्वसाःग्वःगु ज्याझ्वलय् न्ववासें वयेकलं स्थानीय राजनीतिक दल, नागरिक समाज व थीथी संघ संस्थाया प्रतिनीधितय्त झाडापखाला नियन्त्रण यायेत सक्रिय जुइत इनपा यासें बिरामीतय् निंतिं आवश्यक वासः व राहत सामाग्री उपलब्ध यायेत सरकारं छुं कसर मल्यंकेगु प्रतिबद्धता प्वंकादीगु खः ।
भ्रमणया झ्वलय् वय्कलं सीपिनि छेँजःयात प्रति परिवार झिद्वः तका राहत बीगु व विपन्न परिवारयात थप न्याद्वः तका यानाः झिंन्याद्वः तका राहत दां बीगु प्रतिवद्धता नं प्वंकादीगु दु ।
झाडापखाला क्षेत्रया निरिक्षण यायेत प्रधानमन्त्री नेपाल नापं स्वास्थ्यमन्त्री उमाकान्त चौधरी, प्रधानमन्त्रीया प्रेस सल्लाहकार विष्णु रिजाल, नेपाली सेनाया उपरथी डाक्टर सुरजसमशेर राणा, स्वास्थ्य सेवा विभागया महानिर्देशक डा. गोविन्द ओझा व राजनीतिक दलया प्रतिनिधित नापं वंगु खः ।
