जनजाति सभासद्तय् ककस स्वन
येँ(सन्ध्या टाइम्स)/ताःईया कुतः लिपा अन्ततः आदिवासी जनजाति सभासद्तय् सभा (ककस) निर्माण यायेगु ज्या सफल जूगु दु। म्हिगः थन जूगु छगू ज्याझ्वलय् फुक्कं पार्टीइ दुथ्याःपिं आदिवासी जनजाति सभासद्त मुनाः उगु ककस घोषणा याःगु खः ।
ज्याझ्वलय् माओवादी, नेपाली कांग्रेस, एमाले आदि पार्टीया समेत यानाः १२० म्ह जनजाति सभासद्तय् उपस्थिति दुगु खः ।
आदिवासी सभासद्तय् उगु ककसं आत्म निर्णयया अधिकार व जातीय स्वशासन सहितया स्वायत्तताय् आधारित संघीय राज्य निर्माण यानाः आदिवासी जनजातिया अधिकार सुनिश्चित यायेगु ज्यायात थःपिनि उद्देश्य खः धकाः घोषणा याःगु दु ।
थःपिं आवद्ध राजनीतिक पार्टीया बिचाः न्ह्यागु हे जूसां आः दयेकीगु न्हूगु संविधानय् थःपिंसं जातीय स्वशासनयात बः बीगु खँ नं ककसं धाःगु दु ।
अथे हे ककसं अन्तर्राष्ट्रिय श्रम संगठन महासन्धि १६९ पाखें बियातःगु आदिवासी अधिकार कायेगु लागिं थःपिंसं संविधानसभाय् भूमिका म्हितेगु प्रतिवद्धता नं प्वंकूगु दु ।
थुकिया निंतिं आः ककसं छगू मंकाः बिचाः व मंकाः कार्यनीति दयेकेगु ज्या नं यायेत्यंगु खँ धाःगु दु।
