छवाःया कारोबारय् नेप्से थहां वन
येँ (सन्ध्या टाइम्स)/नेप्सेय् थुगु छवाःया दुने जूगु कारोबार न्हापांगु न्हिया तुलनाय् २४ दशमलव ८१ अंकं थहां वःगु दु। थुगु वालय् ७११ दशमलव शून्य ६ अंकं शुरु जूगु कारोबार थहां वनाः लिपांगु न्हि ७३५ दशमलव ९४ अंकय् थ्यंकाः बजाः बन्द जुल ।
अथे हे थुगु छवाःया कारोबारय् दकलय् अप्वः जलविद्युत समूहया उपसूचक थहां वंगु दु। न्हापांगु न्हि ९१० दशमलव ९७ अंकं शुरु जूगु थुगु समूहया कारोबार ११७ दशमलव ४६ अंकं थहां वनेवं १०२८ दशमलव ४३ अंकय् थ्यंकाः बजाः बन्द जूगु खः ।
थुगु वालय् कारोबारया संख्या धाःसा वंगु वाः स्वयां म्हो जक जुल। थुगु वालय् जूगु ७० गू कम्पनीया २४३४ गू कारोवारं स्वीगुंगू करोड पीगू लाख व नीप्यद्वः तका दां बराबरया झिगू लाख चय्छद्वः व निसः कित्ता शेयर न्याये-मी जूगु दु। थ्व वालय् दांया ल्याखं जूगु कारोबार वंगु वालय् जूगु कारोबार स्वयां ३ दशमलव शून्य ६ प्रतिशतं थहां वंगु दु।
वंगु वालय् ४५०२ शेयर कारोबारपाखें स्वीच्यागू करोड नीस्वंगू लाख व झिस्वद्वः तका दांया गुंगू लाख स्वद्वः व न्हय्सः कित्ता शेयर न्याये-मी जूगु खः ।
थुगु वालय् जूगु कूल कारोबार म्धयेय् 'क' वर्गया कम्पनीया जक नीछगू करोड झिंगुंगू लाख तकाया कारोवार जुल। नेप्सेय् जूगु थ्व कूल कारोवारया ५३ दशमलव ७८ प्रतिशत खः। थ्व ल्याखं सेन्सेटिभ थुगु वाःया न्हापांगु न्हिया तुलनाय् ४ दशमलव २१ अंकं थहां वनाः १९५ दशमलव १८ अंकय् थ्यंगु दु ।
थुगु वालय् कारोबार जूगु कम्पनीत मध्ये खुगू करोड पीन्हय्गू लाख दांया कारोवार याःगु आधारय् नेपाल बङ्गलादेश बैंक, न्यागू लाख पीप्यद्वः कित्ता शेयर न्याये-मी जूगु आधारय् नेशनल हाइड्रो पावर कम्पनी व निसः व गुइखुगू कारोबार याःगु संख्याया आधारय् बैंक अफ एशिया नेपाल दकलय् न्ह्यःने लाःगु दु। क्यापिटल मर्चेण्ट बैंकिङ्ग एण्ड फाइनान्स छगूया जक बोनस शेयर सूचीकृत जुल ।
