थौं नं निसें हाकनं माओवादी केन्द्रिय समितिया बैठक
नायः प्रचण्डया खराब स्वास्थ्यया कारण छुं दिं स्थगित यानाः आइतवा: निसें न्ह्याःगु माओवादी केन्द्रिय समितिया बैठक थौंयात क्वचाःगु दु ।
कोटेश्वरया पेरिसडाँडाय् च्वंगु केन्द्रीय ज्याकुथिइ सुथय् झिंछताः ईलिपा च्वंगु बैठकय् निम्ह सल्लाहकार, निम्ह सचिवालय व निम्ह पोलिट्व्युरो दुजलं प्रचण्डया प्रस्तावदथुइ थःगु धारणा तःगु दु ।
थौं कृष्ण दास श्रेष्ठ, भक्त बहादुर श्रेष्ठ, नेत्रविक्रम चन्द 'विप्लप', बर्षमान पुन 'अनन्त', हेमन्त प्रकाश वली व गोपाल किरातीं थःगु धारणा तयादीगु दु । फुक्कसिया धारणा सकारात्मक जूगु बैठकलिपा पार्टी प्रवक्ता दिनानाथ शर्मां जानकारी बियादीगु दु ।
असार २४ गतेपाखे न्ह्याःगु केन्द्रीय समिति बैठकया नायः प्रचण्डं वर्तमान परिस्थितीइ सर्वहारा वर्गया दायित्व शीर्षकय् झिंछगू पृष्ठ ताःहाकःगु राजनैतिक तथा साङ्गठनिक प्रतिवेदन न्ह्यब्वःगु खः ।
प्रतिवेदनय् धारणा तयेगु फुक्क दुजःतय्सं प्रतिवेदनय् प्रस्ताव यानातःगु राष्ट्रपतिया पला: भिंकाः माओवादी नेतृत्वय् हे राष्ट्रिय सरकार गठनय् सहमति क्यंगु दु । प्रतिवेदनप्रति सहमति क्यंसें दुजःतय्सं पार्टी सामुहिक नेतृत्वय् वनेमाःगु, पूर्णकालिन कार्यकर्तातय्गु व्यवस्थापन यायेमाःगु लगायत विषयसं नेतृत्वया ध्यानाकर्षण याकूगु दु ।
केन्द्रीय समितिया बैठक न्ह्यानाच्वंबले नायः प्रचण्डया स्वास्थ्यय् खराबी खनेदयेवं स्वन्हुतक बैठक स्थगित जूगु खः ।
