छाता आयोग दयेकाः वंसा: बांलाइगु
आर्थिक वर्ष २०६६-६७ या विनियोजन बिध्येक दथुइया सहलह यायेत व्यवस्थापिका संसदया बैठक थौं नं निसें न्ह्याःगु दु ।
पेश्की खर्च बिध्येक पारित जुइधुंकाः विनियोजन बिध्येकदथुइया सहलह न्ह्याःगु खः । अर्थमन्त्री सुरेन्द्र पाण्डें छवाः न्ह्यः २ खर्ब ८५ अर्ब ९३ करोड तकाया अनुमानित आय-व्यय न्ह्यब्वःगु खः । थ्वहे झ्वलय् संवैधानिक निकायया संरचना निर्धारण समितिया मस्यौदा व अवधारणापत्र दथुइ संविधानसभाय् थौं जूगु सहलहसं फुक्क दलया सभासदतय्सं संवैधानिक आयोगत यक्वः दयेकेगु स्वयाः दुगुयात प्रभावकारी दयेकेमाःगुलि ब: ब्यूगु दु ।
थौंया वैठकय् न्वंवासें नेपाली कांग्रेसया सभासद् गोपालमान श्रेष्ठं आयोगत न्हापाया इलय् नं दयेकूगु तर निष्पक्ष जुयाः ज्या यायेमफुगु धयादीगु दु ।
एकीकृत नेकपा (माओवादी)या सभासद् नन्दकुमार प्रसाईं न्हापा दयेकूगु आयोगत पङ्गु थेंज्याःगु दयेकूगुलिं आः दयेकीगु आयोगत अज्याःगु दयेके मज्यूगु धारणा तसें महिला व दलित आयोग दयेकेमाःगु धयादीगु दु ।
वय्कलं प्रस्तावित मेगु आयोगत मानव अधिकार सम्बन्धी आयोगया कुसा क्वये तयेमाः धयादिल । सभासद् प्रसाईं सीमा आयोगं नेपाःया प्राकृतिक सम्पदा व जडीबुडीया संरक्षण व संरक्षणया ज्याय् राज्य प्रतिबद्ध जुइमाःगु धयादीगु दु । वय्कलं दलतय्त पुलांगु हे राज्यया पुनसंरचना यायेगु खः कि न्हूगु राज्यया संरचना यायेगु खः थुगु विषयसं नं प्रष्ट जुइत इनाप यानादिल ।
एमालेया सभासद् रबिन्द्र अधिकारीं आयोगयात दयेकेवलय् फत्तले छाता आयोग दयेकाः वनेवले बांलाइगु धयादीगु दु । वय्कलं फुक्क मिलय् जुयाः वंसा बांलाइगु धयादिसें मिले जुयाः वनेगुया बिकल्प मदुगु धयादिल ।
मालेया सभासद तथा उद्योगपति राजेन्द्र कुमार खेतानं आयोग यक्वः दयेकेगु स्वयाः नं दुगु यात प्रभावकारी दयेकेगु पाखें बिचाः यायेमाः धयादिल ।
