'प्रजातन्त्रया निंतिं लाकां तकं नयाःगु दु'
नेपाली कांग्रेसया सभापति गिरिजाप्रसाद कोइरालां माओवादी जनसेनायात सेनाय् समायोजनया पलेसा समाजय् पुनःस्थापना यायेमाःगु खँ धयादीगु दु । माओवादी जनसेनायात जनतां स्वीकार यायेमफुगु दावी यासें कोइरालां घुलमील जुइगु वातावरण मिलय् यायेत उपिंलिसे समाजय् हे पुनःस्थापना यायेमाः धयादिल ।
येँ लिहाँझाये न्ह्यः आइतवा: सुथय् गृहनगर विराटनगरय् सञ्चारकर्मीत लिसे खँल्हानादिसें सभापति कोइरालां माओवादी लडाकूयात सेनाय् समायोजन यानाः राष्ट्रिय सेनाया अवमूल्यन यायेमज्यूगु जिकिर यानादिल । न्हय्गू दलया सहमतिइ नं माओवादी लडाकूयात सेनाय् समायोजन यायेगु न्ह्यथना मतःगु कोइरालाया धापू दु ।
माओवादीं ब्वति मकाःसां नं वर्तमान सरकार पुरा अवधि टिके जुइगु धासें वय्कलं 'माओवादी सरकारय् वयेगु-मवयेगु धइगु खँ जिं मस्यू तर थ्व सरकार चुनाव तक टिके जुइ ।'
शनिवा: झापाया ज्याझ्वलय् माओवादी बेपत्ता परिवार समाजया कार्यकर्तातय्सं याःगु अवरोधप्रति लक्षित यासें कोइरालां धयादील 'जिं प्रजातन्त्रया निंतिं लाकां समेत नयाःगु दु हाकुगु ध्वाय नं जितः छुं असर याइमखु ।'
