संवैधानिक समितिलया सभापतिलय् बाबुरामया नां प्रस्ताव
एकिकृत नेकपा (माओवादी)या संविधानसभा बोर्डया बैठकं संबैधानिक समितिया सभापतीइ बरिष्ठ नेता डा. बाबुराम भट्टराईयात छ्वयेगु निर्णय याःगु दु । थौं सुथय् एकीकृत नेकपा माओवादी संविधानसभा दलया ज्याकुथि च्वंगु वोर्डया वैठकं डा भट्टराईयात छ्वयेगु निर्णय याःगु संविधानसभा दलया उपनेता नारायणकाजी श्रेष्ठ प्रकाशं जानकारी बियादीगु दु ।
संविधान निर्माणया निंतिं दकले महत्वपूर्ण रुपं कयातःगु संवैधानिक समितिया सभापति एमाले नेता माधव कुमार नेपाल प्रधानमन्त्री जुइधुंकाः उगु पद खाली जुयाच्वंगु खः ।
पद खाली जुइवं माओवादीं डा. भट्टराईयात सभापतिया निंतिं प्रस्ताव याःगु खः । थुकिया निंतिं दलतलिसे थप सहलह यायेगु माओवादीं जानकारी ब्यूगु दु । संबैधानिक समितिया सभापति मदयाः संविधान निर्माणया गुलिखय् महत्वपूर्ण ज्या दिनाच्वंगु दु ।
अथेहे बोर्ड बैठकं व्यवस्थापिका सदनया बैठकय् विशेष व सुन्य ई कयाः राष्ट्रिय महत्वया विषयसं पार्टीयापाखें धारणा तय्गु निर्णय याःगु नेता प्रकाशं जानकारी बियादीगु दु ।
