प्रधामन्त्री नेपालया निरिक्षण ज्याझ्वः
प्रधानमन्त्री माधवकुमार नेपालं झाडापखाला प्रभावित जाजरकोट नापं मध्य पश्चिमया पहाडि जिल्लाया निरीक्षण यानादीगु दु । छुं मन्त्री व विभागीय प्रमुखतलिसे आइतवा: सहलह यानाः प्रधामन्त्री नेपालं निरिक्षणया ज्याझ्वः क्वःछीनादीगु खः ।
झाडापखाला नियन्त्रणया निंतिं सरकारं वेवास्ता यानाच्वंगु द्वपं लानाच्वंगु इलय् प्रधानमन्त्रीं सोमवा: जाजरकोट झायाः अनया अवस्थाबारे जानकारी काइगु जानकारी सहलहस ब्वति दुम्ह गृहमन्त्री भीम रावलं बियादीगु दु ।
रावलया कथं सहलहस प्रभावित क्षेत्रय् निःशुल्क वासः उपलब्ध यायेगु व निलाया निंतिं चिकित्सक करारय् कयाः जूसां नं उपचार सेवायात प्रभावकारी दयेकेगु निर्णय याःगु दु ।
अथेहे आइतवा: सुथय् च्वंगु माओवादी संसदीय बोर्डया बैठकं झाडापखाला प्रभावित मध्यपश्चिमया पहाडि जिल्लाय् वासःय् ग्वाहालि यायेत फुक्क सभासदतय्सं जनही द्वछिया दरं आर्थिक ग्वाहालि यायेगु निर्णय याःगु दु ।
बैठकं मध्य पश्चिमया जिल्लाय् न्यनाच्वंगु झाडापखालाया महामारीप्रति सरकारी उदासीनताया खँय् च्यूताः प्वंकूगु दु ।
