सरकारय् ब्वति कायेत प्रचण्डयात प्रमया इनाप
प्रधानमन्त्री माधवकुमार नेपालं एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड'यात सरकारय् ब्वति कायेत इनाप यानादीगु दु ।
आइतवाः सुथय् माओवादी अध्यक्ष प्रचण्डया छेँय् थ्यंकाः प्रधानमन्त्रीं थ्व इनाप यानादीगु खः । तर माओवादी अध्यक्ष प्रचण्डं सरकारय् ब्वति कायेगु अवस्था मदुगु धासें राष्ट्रपतिया पलाः लित कयाः प्रधानसेनापति रुक्मांग कटवालयात कारवाही यायेत माग यानादिल ।
इजिप्ट भ्रमण लिपा न्हापांगु खुसी प्रचण्डनाप नापलानादी झ्वलय् राजनीतिक अवस्था व दलत दथुइ खनेदुगु आपसी तिक्तता क्वचायेकेगु बारे सहलह जूगु खः । प्राधनमन्त्रीं थःगु इजिप्ट भ्रमणय् शान्ति प्रकृया व संविधान निमार्णय् अन्तर्राष्ट्रिय समुदायं क्यंगु च्यूताया बारे माओवादी अध्यक्ष प्रचण्डयात जानकारी बियादीगु खः ।
अथेहे प्रधानमन्त्रीं अध्यक्ष प्रचण्डया स्वास्थ्य अवस्था बारे नं जानकारी कयादीगु खः ।
