सहमतियात रणनीति देयेकूसाः माओवादीया पतन जुइ : कोइराला
नेपाली कांग्रेसया सभापति गिरिजाप्रसाद कोइरालां आःया अवस्थाय् दलत दथुइ सहमति, सहकार्य व एकतायात माओवदीं रणनीति देयेकूसाः वयाः पनत जुइगु ख्याच्वः बियादीगु दु ।
माओवादीया तीव्र विरोधया दथुइ शनिवाः विर्तामोडया मुक्तिचोकय् जनआन्दोलन स्मृति स्तम्भया उल्लेज्या यायेगु ज्याझ्वलय् कोइरालां उगु ख्याच्वः बियादीगु खः । वयेकलं सहमति, सहकार्य व एकता आःया मिसन जूगु धासें धयादिल, - 'माओवादीं थुकीयात स्ट्राटेजी देयेकीगु धृष्टता यानाच्वंगु दु, उकीं हे वयाः पतन सिवाय छुं जुइ मखु ।'
ज्याझ्वलय् माओवादीया विरोधप्रति लक्षित यासें कोइरालां इतिहास हुइ धाइपिं कालान्तरय् थःहे हुया वनीगु धयादिल । जुजुं इतिहास हुइगु धाःधां थः हे हुयावंगु धयादिसें कांग्रेस सभापति कोइरालां आः नं इतिहास हुइ धाइपिं याकनं हे थःहे हुयावनीगु धयदिल ।
कोइरालां सरकार संचालनया उच्चस्तरीय संयन्त्रय् ब्वति कायेकत माओवादीयात इनाप यानादिल । वयेकलं माओवादीयात गम्भीर जुया न्ह्यायेत नं इनाप यानादिल ।
ज्याझ्वलय् एमालेया नेता केपी शर्मा ओलीं माओवादीया तीव्र आलोचना यासें गुरिल्ला सर्वोच्चताया निंतिं नागरिक सर्वोच्चता धकाः हालाच्वंगु द्वपं बियादिल । वयेकलं माओवादी अराजकतायात सरकारं आः नियन्त्रण यानां त्वतीगु धयादिल ।
थ्वस्वयां न्ह्यः स्मृति स्तम्भ उल्लेज्या यायेगु ज्याझ्वलय् माओवादी निकट सहिद व बेपत्त परिपार समाजं ज्याझ्वलय् थःपिनि अपमा जूगु धासें ज्याझ्वलय् अवरोध यायेवं झापाया बिर्तामोड तनावग्रस्त जूगु दु ।
ज्याझ्वलय् सहिद परिवारं जनआन्दोलनया सहिदयात अपमान याःगु धासं कोइराला व ओलायात हाकूगु ध्वाँय् क्यंसें अप्पां क्येगूगु खसाः लिपाः प्रहरीं स्थिति नियन्त्रणय् कायेत लाठीचार्ज व अश्रुग्यास प्रहार याःगु खः । सहिद परिवार व प्रहरीत दथुइ झडप व तनाव जारी जूगुलिं बिर्तामोडय् व्यापक प्रहरी परिचालन याःगु ख: । झडपय् लानाः सशस्त्र प्रहरी निरीक्ष दिनेश आचार्य नापं प्यम्ह प्रहरी व झिंन्याम्ह प्रर्दशनकारी घाःपा जू्गु दु ।
सुरक्षाया कारणं स्तम्भ उल्लेज्या लिपाःया ज्यझ्वः निर्धारित थासय् मयासें मेथाय् हे याःगु खः । थ्वस्वयां न्ह्यः कडा सुरक्षाया दथुइ कांग्रेस सभापति कोइराला व एमाले नेतां स्तम्भया मंकाः उल्लेज्या यानादीगु खः ।
