तलब बृद्धि यायेगु प्रतिबद्धता
कर्मचारी संगठनत विभाजित
सरकारं कर्मचारीतय् माग सम्बोधन यायेगु कथं तत्काल तलब बृद्धि यायेगु प्रतिबद्धता प्वंकूगु दु ।
आन्दोलनरत कर्मचारी संघ-संगठनत नाप शनिवाः अर्थ मन्त्रालय् जूगु वार्ताय् सरकारी पक्षं आइतवाः च्वनीगु मन्त्रिपरिषदया बैठक मार्फत कर्मचारीतय् तलब बृद्धिया निर्णय यायेगु प्रतिबद्धता प्वंकूगु खः । वार्ता लिपा अर्थमन्त्री सुरेन्द्र पाण्डे सरकारया क्षमता कथं सुविधा बृद्धि यायेगु धयादिल ।
सरकारी प्रतिबद्धता नापं आन्दोलनरत कर्मचारी संघ संगठनत विभाजित जूगु दु । आन्दोलनरत खुगू मध्ये प्यंगू संगठनत सरकारी प्रतिबद्धताया कार्यान्वयन जुइ वा मजुइगु खँ पीगु जूगु दुसाः निगू संगठनत धासाः आन्दोलन जारी तयेगु खँ धाःगु दु ।
कांग्रेस निकट कर्मचारी युनियनं थःगु मागप्रति सरकार गम्भीर मजूगु धासें शनिवाःया वार्ता बहिष्कार यासें प्रतिशतया आधारय् तलब बृद्धि मजुतल्ले आन्दोलन जारी तयेगु खँ धाःगु दु । अथेहे नेपाल निजामति कर्मचारी मधेशी मञ्चं मेमेगू संगठनं आन्दोलन स्यंकेत स्वःगु धासें आन्दोलनयात थप सशक्त यायेगु ख्याच्वः ब्यूगु दु ।
