शान्ति प्रकृया धरापय् : महासचिव मुन
संयुक्त राष्ट्रसंघया महासचिव वान की मुनं नेपाःया राजनीतिक दलत दथुइया असमझदारी व जारी तनावं शान्ति प्रकृयायात दीर्घकालीन रुपं कमजोर देयेकीगु खँय् च्यूताः प्वंकादीगु दु । वयेकलं नेपालं छुं दँय् चूलाकूगु उपलब्धीत ल्हातं वनेमबीत व शान्ति प्रकृयात खतराय् मलाकेत राजनीतिक दलत दथुइ एकता जुइमाःगु खँय् बः बियादिल ।
शुक्रवाः बहनीइ न्यूयोर्कय् सार्वजनिक या:गु नेपाः सम्बन्धी प्रतिवेदनय् वानं संविधान निर्माणया प्रकृया व देशय् मुख्य संस्थात सबल रुपं स्थापना मजूतल्ले मंकाः दृष्टिकोण व मार्गचित्रय् सहमत जुइमाःगु धयादिल ।
माओवादी लडाकूया समायोजन व पुर्नस्थापना व न्हूगु संविधानया निर्माण थंज्याःगु शान्ति प्रकृयाया प्रमुख कार्यभार लिप्पांगु ईलय् वयाः छुं नं प्रगति मजूगु धासें चिन्ता प्वंकादीगु ख: । प्रतिवेदनय् वानं सेनापति प्रकरण, कब्जा याःगु सम्पत्ति लितः बीगु, युवा पुचःत हिंसात्मक गतिविधि लगायत समस्या याकनं समाधन यानाः न्ह्याः वनेत इनाप यानादिल ।
लिप्पांगु खुसी राष्ट्रसंघीय नियोग अनमिनयात निर्धारित मितिइ नेपालं बिदाई यायेगु प्रतिबद्धिता कथं ज्या मजूगु धासें खेद प्वंकादिल । नेपाः सरकारया इनाप कथं महासचिव वानं अनमिनया कार्यवधि खुलाः तनेगु प्रस्ताव सहित राष्ट्रसंघीय सुरक्षा परिषदय् प्रतिवेदन पेश याःगु खः ।
प्रतिवेदनय् मेगू वाःलय् सहलह जुइगु ज्याझ्वः दु ।
