'वर्तमान सरकारपाखें तःधंगु आश यानाच्वंगु दु'
प्रधानमन्त्री माधवकुमार नेपालं वर्तमान सरकार पाखें थीथी देशं तःधंगु आशा यानाच्वंगु खँ धयादीगु दु ।
इजिप्टय् सम्पन्न असंलग्न राष्ट्रतय् झिंन्याक्वःगु शिखर सम्मेलनय् ब्वति कयाः शनिवाः नेपाः लिहांझयादिम्ह प्रधानमन्त्री नेपालं शिखर सम्मेलनय् ब्वति कायेगु झ्वलय् न्यय्नीगु देय्या राष्ट्र प्रमुख व सरकार प्रमुखतय्सं नेपाःयात न्ह्याःगु कथंया ग्वाहालि यायेत नं तयार जूगु आश्वासन ब्यूगु धयादिसें वर्तमान सरकारपाखें उमिसं तःधंगु आशा याःगु जानकारी बियादिल ।
सम्मेलनं ब्वति कयाः लिहाझायेवं त्रिभुवन विमानस्थलय् पत्रकार सम्मेलन यानाः वयेकलं प्रमुख प्रतिपक्षी एकीकृत (नेकपा) माओवादीयात सरकारय् ब्वति कायेत इनाप यानादिल । वयेलकं शान्ति प्रकृया, संविधान निर्माण, सेना समायोजन लगायत मुद्दायात निष्कर्षय् थ्यंकेत दक्वं दलतय्त ग्वाहालि आवश्यक जूगु धयादिल ।
वंगु बुधवाः निसें निन्हु तक न्ह्याःगु असंलग्न राष्ट्रतय् सम्मेलनय् प्रधानमन्त्री नेपालं थीथी देय्या राष्ट्र प्रमुख व सरकार प्रमुख नाप दुपक्षिय व बहुपक्षिय हितया बारे खँल्हाबंला नं यानदीगु खः । थ्वहे झ्वलय् वयेकलं संयुक्त राष्ट्र संघया महासचिव वानकी मुन नाप नं शान्ति प्रकृया, संविधान निर्माण, सेना समायोजन लगायत विषयस खँल्हाबंला जूगु जानकारी बियादिल ।
