गृहमन्त्रीया राजीनामा माग यासें सप्तरी बन्द, राजविराजय् कर्फ्यु
सप्तरीया राजनीतिक दलतय्सं गृहमन्त्रीया राजीनामा माग यासें अनिश्चितकालया निंतिं जिल्ला बन्दया घोषणा याःगु दु ।
शुक्रवाः सशस्त्र प्रहरीया गोलीं लाना इटहरी विष्णुपुरया अखिलेन्द्र यादव सीवं जूगु तनावपूर्ण स्थिति अझ नियन्त्रणय् मवःगुलिं शनिवाः सुथय् न्ह्यताः ईलंनिसें अनः हाकनं कर्फ्यु तःगु दु । स्थानीय प्रशासनं सप्तरीया राजविराज नगरपालिका व राजविराज गुनौली सतकय् लाःगु कोसी पश्चिम नहर सतक खण्ड निसें निसः मिटर तक कर्फ्यु आदेश जारी याःगु दु ।
शुक्रवाः सप्तरीया थीथी राजनीतिक दलतय् बैठकं जिल्ला बन्द घोषणा यायेगु व सीम्ह यादवया सहिद घोषणा यायेगु नापं वयात गोलीं क्येकूम्ह सशस्त्र प्रहरीयात कारवाही यायेमाःगु माग याःगु दु । अथेहे प्रमुख जिल्ला अधिकारी रामविलास राय व प्रहरी उपरीक्षक भुपाल भण्डारीयात निलम्बनया माग नं याःगु दु ।
शुक्रवाः भारतं हःगु रसायनीक मलया विषयस प्रहरी व स्थानीयवासीत दथुइ झडप जूगु ईलय् प्रहरीं गोली क्येकूगु खः ।
