घूस फ्वनेवं छेँय् तोडफोड
येँ (सन्ध्या टाइम्स)/जिल्ला प्राविधिक कार्यालय धनुषाया डीई राजकिसोर साहं जनतायाके घूस फ्वंगु द्वपं बिसें जनकपुरया स्थानीय वासिन्दां विरोध प्रदर्शनया लिसें साहया छेँय् नं तोडफोड याःगु दु ।
जनकपुरया ९ वडाया सतक दयेकेत घूस फ्वंगु व घूस मबीवं साहं बजेट निकास मयाःगु धासें थौं सुथंनिसें अनया स्थानीय जनतां टायर च्याकाः प्रदर्शन याःगु खःसा उगु हे वडाय् लाःगु साहया छेँय् नं तोडफोड याना बिउगु खः।
स्थानीय जनतां जिविस धनुषाया स्थानीय विकास अधिकारी विन्दुप्रसाद गुरागाइँ, डीई साह, इन्जिनीयर शम्भु मिश्र व लेखापाल रामदुलार झापिंसं भ्रष्टाचार यानाच्वंगु व उमित राजनीतिक पार्टीतय्सं संरक्षण यानाच्वंगु द्वपं बिउगु दु ।
