जनजातिइ 'ज्यापु' या बिस्कं निवेदन
येँ (सन्ध्या टाइम्स)/ आदिवासी जनजाति उत्थान प्रतिष्ठानय् नेवाः दुनेया ज्यापु समुदायं नं थःपिंत जनजाति धलखय् दुथ्याकेमाः धकाः बिस्कं निवेदन दर्ता याःगु दु। उगु धखलय् नेवाः जातियात जनजाति धकाः न्हापा हे दर्ता याना तयेधुंकूगु दु ।
प्रतिष्ठानपाखें प्राप्त जानकारी कथं जनजाति धलखय् दुथ्याकेत नेवाः जाति दुनेया महर्जन (ज्यापु) बाहेक बलामि, प्रजापति व पोडे जातं नं बिस्कं बिस्कं निवेदन बियातःगु दु।
प्रतिष्ठानय् थःपिं नं जनजाति खः धकाः दर्ता याये हःगु थज्याःगु आपालं निवेदन बारे अध्ययन यानाः निर्णय यायेत डा. ओम गुरुङ्गया नेतृत्वय् छगू कार्यदल दयेकातःगु दु ।
प्रतिष्ठानय् ज्यापु जातयात नं जनजाति कथं दर्ता याकेत निवेदन बीगु ज्या थनया ज्यापु महागुथिया समेत पहलय् जूगु खः। थ्व बारे ज्यापु महागुथि येँ नगर समितिया नायः इ. मोहनकृष्ण डंगोलयात स्वापू तयाबलय् वय्कलं नेवाः जक धायेबलय् सु नेवाः धइगु न्ह्यसः वइगु जूगुलिं पहिचान स्पष्ट यायेत थःपिंसं थ्व निवेदन तयागु खँ कनादिल ।
थकालितय् नं निगू स्वंगू पुचलं अथे दर्ता यानातःगु खँ कनादिसें वय्कलं धयादिल, 'झीगु नं तःगू मछि पुचः दर्ता जूसां वनेबलय् छप्पँ जुयाः वंसा नेवाः शक्ति अझ बल्लाः वनी।'
