कार्यतालिकाय् जुइत्यंगु मेगु संशोधन

संविधान च्वयेगु लागिं दयेकातःगु कार्यतालिका हानं छक्वः संशोधन जुइगु जूगु दु। थ्वयां न्ह्यः प्यक्वः ला संशोधन जुइ हे धुंकूगु दु। आः न्याक्वःगु संशोधन यानाः हानं छक्वः संविधान दयेकेगु ग्वसाःयात उखेथुखे यायेत्यंगु खः।
संविधान दयेकेगु हे वर्तमान संविधानसभा व संसदया मू ज्या खः। थ्वहे संविधान च्वयेगु लागिं राज्यं अर्बौं तका खर्च यानाः संविधानसभाया चुनाव याःगु खःसा चुनावं त्याना वःपिं फुक्क हे सभासद्तय् छगू हे जक एजेण्डा धइगु संविधान च्वयेगु खः। तर विडम्बना, देशय् थ्वहे संविधान च्वयेगु ज्यायात धाःसा सुं हे सभासदं प्राथमिकताया धलखय् लाकातःगु दु। राजनीतिक पार्टीतय्गु ध्यान थ्व इलय् दुगु सरकार क्वःथलेगु, मेगु सरकार दयेकेगु, फुसा वयात नं क्वःथलाः हानं मेगु सरकार दयेकेगु ज्याय् हे जक केन्द्रित जुयाच्वंगु दु। उकिया हे लिच्वः कथं संविधान दयेकेगु ज्या लिज्यां लिज्यां वनाच्वंगु खः। संविधान दयेकेगु लागिं धकाः तयार यानातःगु कार्यतालिकायात हानं हानं संशोधन यायेमाःगु आवश्यकता थुकिं यानाः जुयाच्वंगु खः। थःपिंसं हे दयेकागु तालिकायात थथे न्याक्वः तक संशोधन यायेमाःगु धइगु संविधान दयेकेगु जिम्मा कया वःपिं राजनीतिक पार्टीतय्गु घोर गैरजिम्मेवारीपनया दसि खः। पार्टीतय्सं थौंकन्हय् संविधान दयेकेगु ज्याय् गुगु उदासिनता क्यना वयाच्वंगु खः, यदि थ्व थथे हे जारी जुयाच्वनीगु खःसा कार्यतालिकायात संशोधन यायेगु जक मखु मेगु हे कार्यतालिका दयेकाः ज्या यायेमालीगु अवस्था नं मवइ धाये फइ मखु। उकिं संशोधन कार्यतालिका मखु पार्टीतय्गु पहःयात यायेमाःगु मू आवश्यकता दु ।

More Stories Like this