ख्यातीया हत्यारातय्त जेल चलान
येँय् जिल्ला अदालतं येँय् हत्या याम्ह ख्याती श्रेष्ठया हत्या अभियुक्ततय्त पुर्पक्षया निंतिं जेलय् कुनेत आदेश ब्यूगु दु ।
शुक्रवाः न्यायधीश भुपेन्द्र राईया एकल इजलाशं हत्याया अभियुक्त विरेन श्रेष्ठ व मेरिना शाक्ययात केन्द्रीय कारागार सुन्धाराय् कुनेत आदेश ब्यूगु खः । थ्वस्वयां न्ह्यः निगुलिं पक्षया कानुन व्यवसायीतय्सं थुनछेकया बहस याःगु खः । अभियुक्त श्रेष्ठं हत्याय् थःगु संलग्न दुगु खँ स्वीकार यासें थःत मृत्युदण्डया सजाय बीत माग याःगु खः । मेम्ह अभियुक्त शाक्यं धासाः थःगु संलग्नता अस्वीकार यासें निर्दोष जूगु दावी याःगु खः ।
जेठ २१ गते ख्याति श्रेष्ठयात येँय् नं अपहरण या:गु खसा: नीछन्हु लिपा हत्या यानाः वयाः थीथी अंगत येँय् व चितवनय् वंछ्वयातःगु खः । अथेहे शुक्रवाः पीडित पक्षं अदालत परिसरं पिहावनेगु ईलय् अभियुक्ततय्त आक्रमणया कुतः याःगु खः । उगु ईलय् प्रहरीं हस्तक्षेप यावलय् पत्रकार, प्रहरी व प्रदर्शनकारी नापं यानाः खुम्ह घाःपा जूगु दु ।
अदालतया सुनुवाईलय् संचारकर्मीतय्त प्रवेश यायेमबीवं मदुम्ह ख्यातिया छेँजःपिंसं प्रदर्शन यावय् अदालतया झ्या तछयानाब्यूगु दुसाः अदालतया मू ढोकाय् नं क्षति यानाब्यूगु दु ।
(किपा - ख्याती श्रेष्ठ)
