अयोग्य लडाकूतय् पुनर्स्थापना प्रकृया सुरु
सरकारं राष्ट्र संघीय नियोग अनमिनया प्रमाणिकरणय् अयोग्य ठहर जुपिं माओवादी लडाकूतय् पुनर्स्थापना प्रकृया शुक्रवाः निसें न्ह्याःगु दु ।
शान्ति व पुनःनिर्माण मन्त्रालयं बिहीवाः पत्रकार सम्मेलन यानाः कात्तिक १६ गते दुने अयोग्य लडाकूतय्त शिविरं लिकयाः सम्मानजनक पुनर्स्थापना यायेगु जानकारी ब्यूगु खः ।
शुक्रवाः मन्त्रालयया निर्देशन कथं शान्ति मन्त्रालयया शिविर व्यवस्थापन शाखाया उपसचिव गोविन्द खनालया नेतृत्वया पुचः सुथय् हे हेलिकप्टर मार्फत नवलपरासीइ च्वंगु प्यंगू डिभिजनय् वंगु खः । मन्त्रालयं नवलपरासीइ च्वंगु सत्यकुर शिविरं लडाकू चीकेगु ज्या सुरु यायेगु खँ धाःगु दु । थुकीया निंतिं शान्ति मन्त्रालयया नेतृत्वय् अनमिन व माओवादीया नं ब्वतिइ अनुगमन समिति गठन याइगु जूगु दु ।
मन्त्रालयं न्हापांगु चरणय् अयोग्य लडाकूतय्त फारम वितरण यानाः उमि इच्छाया सीकीगु जूगु दु । मन्त्रालयं उमिगु इच्छा कथं लडाकूतय् व्यवस्थापन यायेगु जानकारी ब्यूगु दु ।
देया न्ह्य्गु मुख्य व नीच्याःगु सहायक शिविरय् दुपिं माओवादी लडाकू मध्ये अनमिनया प्रमाण्किरण कथं प्यद्वं व च्याम्ह लडाकूत अयोग्य ठहर जूगु खः ।
