थिमिया जनतापाखें चौकी घेराउ

थिमि (सन्ध्या टाइम्स)/ मचा अपहरणया द्वपनय् चपाच्वय् दायाः स्वम्ह मनू स्याःगु आशंकाय् छुं स्थानीय मनूतय्त ज्वनातःगुलिं उकिया विरोध यासें थौं चपाच्व व धुन्चेया सलंसः मनूतय्सं थिमिया प्रहरी चौकी घेराउ यात। निगुलिं थासं वःपिं करिब न्यासःम्ह मनूतय्सं थिमिया चौकीइ धर्ना बिसें ज्वनातःपिं निर्दोष मनूतय्त तुरुन्त त्वःतेमाः धकाः माग याःगु दु। थुकिं यानाः थिमिया प्रहरी चौकीइ तनाव जुयाच्वंगु दु ।

चपाच्वय् सीपिं विद्यार्थीया छेँजःपिंसं हत्यारायात कारवाही यायेमाः धइगु माग यासें वंगु छुं न्हि न्ह्यवंनिसें कोटेश्वर जडिबुटी लागाय् सतक जाम यानाः दवावय् बीवं प्रहरीं अपराधी मालेगु नामय् थिमि व धुन्चेया स्थानीय मनूतय्त लाथेपाथे ढंगं ज्वनेगु शुरु याःगु खः। तर उकी फुक्क हे निर्दोष मनूत लात धासें स्थानीय मनूतय्सं उमित त्वःतेगु माग यानाः थौं प्रहरी चौकीइ धर्ना बिउगु खः ।