विजयनाथया 'फैसला' प्रम वयेकाः
येँ (सन्ध्या टाइम्स)/ नेपाल राष्ट्र बैंकया निल म्बित गभर्नर विजयनाथ भट्टराई विरुद्ध सर्वोच्च अदालतय् लानाच्वंगु भ्रष्टाचार सम्बन्धी मुद्दाय् सफाई प्राप्त जुइवं आः राष्ट्र बैंकया गभर्नर पद छु जुइ धइगु अन्यौल पिहां वःगु दु ।
राष्ट्र बैंक पुनर्संरचनाया लागिं विश्व बैंकपाखें वःगु ग्वाहालि दांयात थः यत्थे छ्यलाः २ करोड ४५ लाख ४६ हजार २४५ तका दां हिनामिना याःगु द्वपनय् अख्तियार दुरुपयोगपाखें वय्कः नापं बैंकया कार्यकारी निर्देशक सुरेन्द्रमान प्रधान विरुद्ध थ्व मुद्दा तयातःगु खः ।
फैसला वयेवं आः भाजु भट्टराईनं थःगु गभर्नर पद हानं बहाली जुइमा धकाः दावी याइगु संकेत खने दयावःगु दु। वय्कःया कार्यकाल माघ महिना तक दनि। भ्रष्टाचारया मुद्दा लायेवं सरकारं वय्कःयात निलम्बन याःगु खः। यदि वय्कःयात हानं पुनर्वहाली यायेगु खःसा वर्तमान गभर्नर दिपेन्द्र बहादुर क्षेत्रीयात चीकेमाःगु जुइ । थ्व ज्या मन्त्रिपरिषदं हे यायेमाः। तर अर्थ मन्त्री सुरेन्द्र पाण्डें धाःसा प्रधानमन्त्रीलिसे सल्लाह मयासे थ्व बारे छुं निर्णय याये फइ मखु धकाः धयादीगु खँ सूत्रं कंगु दु। प्रम धाःसा थ्व इलय् देशय् मदुगुलिं थ्व बारे लिपा हे जक निर्णय जुइगु खँ सूत्रं धाःगु दु ।
थ्वहे वलय् मुद्दा त्यायेवं भाजु भट्टराई थौं हे राष्ट्र बैंक वनीगु धाःसां न्हिनय् १२ बजे तक वय्कः राष्ट्र बैंकय् थ्यंकः वःगु धाःसा मदुनि। बैंकया छुं कर्मचारीतय्सं वय्कःयात गाडीं कायेके छ्वयेमाः धकाः नं प्रस्ताव तयाच्वंगु खँ सूत्रं धाःगु दु ।
