कार्यतालिकाय् प्यक्वःगु संशोधन
येँ (सन्ध्या टाइम्स)/संविधान दयेकेगु कार्यतालिका हाकनं संशोधन याइगु जूगु दु। थौं च्वनीगु कार्यव्यवस्था समितिया बैठकय् सभामुख सुवास नेम्वाङ्गं संशोधनया प्रस्ताव तयादीगु ज्याझ्वः दु ।
वय्कलं तयादीगु उगु प्रस्तावयात थौं हे संविधानसभाय् पारित याइगु ग्वसाः नं दु ।
क्वःछिनातःगु ईया दुने ११ गू समितिं थःपिनि ज्या क्वचायेके मफुगुलिं कार्यतालिका संशोधन यायेत्यंगु खः। न्हापाया कार्यतालिका कथं थ्वहे वंगु असार मसान्त दुने झिंछगुलिं समितिं थःपिनि ज्या क्वचायेकेमाःगु खः।
थ्व स्वयां न्ह्यः प्यक्वः तक कार्यतालिका संशोधन यायेधुंकूगु दु ।
उखे दकलय् महत्वपूर्ण समिति संवैधानिक समितिइ अध्यक्ष मदयाः दकलय् समस्या जुयाच्वंगु दु। तत्कालिन संवैधानिक समितिया अध्यक्ष माधव नेपाल प्रधानमन्त्री जुइधुंकाः थौं तक नं न्हूम्ह अध्यक्ष ल्ययेगु ज्या जुइ फयाच्वंगु मदुनि ।
