नेप्से थहां वनेगु क्रम निरन्तर जारी
येँ (सन्ध्या टाइम्स)/वंगु आर्थिक दँया अन्तिम इलय् वयाः शेयर लगानीकर्तातय् निंतिं तसकं सुखद खने दत। असार स्वंगूगु वाः तक नेप्से आशा याःकथं थहां वने मफयेवं लागनीकर्तातय् दथुइ निराशा ब्वलंगु खः। तर स्वंगूगु वाःया अन्तपाखे थहां वनेगु शुरु जूगु नेप्से वंगु आर्थिक दँया लिपांगु न्हि तकं उत्साहजनक रुपं थहां वनेगु क्रमं निरन्तरता काल।
वंगु आर्थिक दँया लिपांगु न्हि म्हिगः नं नेप्सेय् जूगु कारोबारय् दक्वं समूहया उपसूचकत थहां वंगु दु। नेप्से म्हिगः ५ दशमलव ४२ अंकं थहां वनाः समग्रय् ७४९ दशमलव ११ अंकय् थ्यन। सेन्सेटिभ नं शून्य दशमलव ५८ अंकं थहां वंगु दुसा लोट इन्डेक्स नं शून्य दशमलव २८ अंकं थहां वन ।
नेप्से म्हिगः जूगु कारोबारय् उपसूचकत थहां वनेगु क्रमं नं निरन्तरता काःगु दु। वाणिज्य बैंक समूह शून्य दशमलव ६३ अंकं वृद्धि जुयाः ७८० दशमलव ८७ अंकय् थ्यंगु दु । विकास बैंक समूह नं ५ दशमलव ११ अंकं थहां वनाः ७७२ दशमलव ५६ अंकय् थ्यंगु दुसा छन्हु न्ह्यःया कारोबारय् नं दकलय् अप्वः ६७ अंकं थहां वंगु जलविद्युत समूह म्हिगः नं दलकय् अप्वः ६४ दशमलव ३६ अंकं थहां वनाः १०४४ दशमलव ८१ अंकय् थ्यन। फाइनान्स समूह छगू जक दकलय् म्होचा शून्य दशमलव २२ अंकं थहां वंगु दु ।
उखे छन्हु न्ह्यः कारोबार स्वयां म्हिगःया कारोबार धाःसा छुं भचा सन्तोषजनक खनेदत। म्हिगः न्यय्छद्वः न्यासः व नीच्यागू कित्ता शेयर न्याये-मी जुयाः प्यंगू करोड झिंनिगू लाख न्हय्निद्वः तका दां कारोबार जुल। कारोबार जूगु कम्पनीत मध्ये बुटवल पावर कम्पनीया शेयरय् प्रति कित्ता ८८/- तका दां थहां वंगु दुसा सिद्धार्थ बैंक लिमिटेडया शेयरय् प्रति कित्ता ५०/- तका दां कुहां वन ।
म्हिगः दकलय् अप्वः कारोबार याःगु बैंक अफ काठमाण्डु खःसा दकलय् अप्व कमे याःगु किस्ट बैंक व अप्वः गुमे याःगुली डिसिबीएल बैंक जूगु दु ।
