अयोग्य माओवादी लडाकूतय्त शिविरं लिकाइगु
माओवादी लडाकू शिविरय् दुपिं अयोग्य छापामारतय्त शुक्रवाः निसें शिविरं लिकाइगु जूगु दु ।
बिहीवाः शान्तिमन्त्री रकम चेम्जोङं येँय् छगू पत्रकार सम्मेलन यानाः अयोग्य माओवादी लडाकूतय्त शुक्रवाः निसें लिकाइगु जानकारी बियादिल । वयेकलं शुक्रवाः निसें थ्व ज्या कार्तिक १६ गते दुने क्वचायेकीगु धयादिल ।
शान्ति मन्त्रालयया नेतृत्वय् माओवादी, अनमिन व मेमेगू संस्थाया ब्वतिइ प्रमाणिकरणय् मलाःपिं अयोग्य लडाकूतय् व्यवस्थापन शुक्रवाः निसें न्ह्याकीगु जानकारी मन्त्री चेम्जोङ बियादिल । वयेकलं न्हापांगु चरणय् अयोग्य लडाकूतय्त मन्त्रालयया निणर्यत जानकारी बीगु, निगूगु चरणय् उमिगु इच्छा छु धइगु खँ सीकेत न्ह्यसः पौ भरे याकीगु व लिपांगु चरणय् उमित व्यवसायिक तालिम बीगु खँ मन्त्री चेम्जाङं धयादिल ।
वयेकलं माओवादी लडाकूतय्त शिविरं लिकया सही पुनस्थापनाया निंतिं माओवादी नाप नं औपचारिक व अनौपचारिक रुपं सहलह जुया सहमति जुइधुंकूगु धासें माओवादीं थुकी ग्वहालि याइगु विश्वास प्वंकादिल ।
लडाकूया छानबिनलिपा व्यवस्थापन गुकथं यायेगु धकाः अन्तिम निर्णय धासाः उच्चस्तरीय सेना समायोजन समितिं याइगु धयादिल । अनमिनं प्यद्वं व च्याम्ह माओवादी लडाकूयात उमेर मगाःगु धासें अयोग्य ठहर याःगु खः ।
