सिंहदरवार दुने प्रदर्शन याइपिंत कारवाही यायेगु गृहया ख्याच्वः
तलब बृद्धि यायेत दबाब बिया सिंहदरवार दुने निजामति कर्मचारीतय्सं आन्दोलन न्ह्याकातुं च्वंनेवं सरकारं अज्याःपिं कर्मचारीतय्सत कारवाही यायेफइगु ख्याच्वः ब्यूगु दु ।
गृहमन्त्रालयं बुधवाः छगू विज्ञप्ति पिथंसें सिंहदरवार परिसर दुने निषेधित क्षेत्र जूगुलिं विरोध प्रदर्शनया छुं नं कथंया ज्याझ्वःलय् संलग्न मजुइत इनाप याःगु दु । थ्व क्षेत्रय् कानुनया पूर्णपालना याकेगु दायित्वपाखें सरकार पृथक जुइमफइगु खँ गृहमन्त्रालयं विज्ञप्तिइ न्ह्यथंनातःगु दु ।
थ्वस्वया न्ह्यः बुधवाः नं निजामती कर्मचारीतय्सं सरकारं न्हूगु आर्थिक दँय् कर्मचारीतय् तलब बृद्धि मयाःगु धासें सिंहदरवार दुने विरोध प्रदर्शन याःगु खः । थीथी राजनीतिक दल सम्बन्धित कर्मचारी संगठनतय्सं अर्थ मन्त्रालय व स्थानीय प्रशासन मन्त्रालय घेराउ तकं याःगु खः । अथेहे सिंहदरवार दुने लँपनाः सवारी साधनत दीकाः कर्मचारीतय्सं विरोध प्वंकूगु खः ।
लिपाः सिंहदरवार दुने आन्दोलनरत कर्मचारीतय्सं अवरोध स्वरुप तयातःगु सवारी साधन ट्राफिक प्रहरीया ग्वाहालि चीकूगु खः । गृहमन्त्रालयं बुधवाः हे प्रहरी महानिरीक्षक व स्वनिगःया प्रहरी प्रमुखतय्त सःता सिंहदरवार दुने प्रदर्शन दिकेत निर्देशन ब्यूगु दु ।
सरकारं वार्ताया माध्यमं समस्या समाधान यायेगु धासां लँ पनाः, जुलुस व धर्ना बीगु थंज्याःगु ज्यां जनतायात सेवा बीगु ज्याय् प्रत्यक्ष अवरोध जूगु खँ नं गृह मन्त्रालयं पिथंगु विज्ञप्ति न्ह्यथंनातःगु दु ।
