आखिर छाय् दयेकी पूवंके मफइगु बजेट ?
एमाले नेतृत्वया कांग्रेस, फोरम, तमलोपाया मंकाः सरकारं थःगु न्हापांगु बजेट सार्वजनिक याःगु दु । २ खर्ब ८५ अर्ब ९३ करोड तकाया थ्व बजेटयात आलोचना कम व तारिफ यक्व याइपिं पिहां वःगु खने दत। सकस्यां तारिफ यायेबहःगु बजेट दयेकाः सरकारं धाथें नं बांलाःगु हे ज्या याःगु दु धायेमाः ।
तर बजेटय् दुथ्यानाच्वंगु खँयात सकस्यां तारिफ याःसां उकियात कार्यान्वयन नं याये फइगु खः ला धइगु खँय् धाःसा यक्वसिनं शंका प्वंकूगु दु। बजेटय् आपालं बांलाःगु खँ दु। तर सरकारं उकियात पूवंकीगु खँय् धाःसा सुयां हे विश्वास मदु।
आखिर सरकारं थथे पूवंके फइ धइगुली हे शंका जुइ कथंया बजेट छाय् दयेकल? थःपिंसं दयेकागु बजेटय् उल्लेखित खँत पूवंके फइगु खः वा मखु धइगु ला सरकारं नं मसिउगु ला पक्कां खइ मखु। तर नं सरकारं अज्याःगु असम्भव खँत बजेटय् समावेश याःगुया छता हे जक कारण जुइफु, जवाफदेहिताया अभाव। बजेटय् उल्लेख याःगु खँत छुं जुयाः पूमवन हे धाःसां सरकारं सुयातं जवाफ बीमाःगु आवश्यकता मदु। यदि सुनां न्यन हे धाःसां नं सरकारं लिसः बी - शान्ति सुरक्षाया अभाव, विपक्षीं याके मबिउ, हडताल, बन्द आदि। दोष मेपिंत चीकाः थःगु कमजोरी त्वपुइगु आपालं उपायत दु। थःपिंसं हे ताः तयागु लक्ष्य पूमवन धकाः सरकार लज्या चायेमाःगु, सुयातं स्पष्टीकरण बीमाःगु वा क्षमा फ्वनेमाःगु आवश्यकता मदु। अय् जुयाः कमजोर बजेट दयेकाः आलोचनाया पात्र जुयाच्वनेगु स्वयां फयांफछि बांलाःगु निबन्ध थेंज्याःगु बजेट दयेकाः न्ह्यब्वल धाःसा तारिफसां जुइ । आःया बजेट थ्व मानसिकतां ग्रस्त खनेदु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
