बुलुसेच्वंगु झीगु आर्थिक किपा

सरकारं पिकाःगु न्हूगु आर्थिक र्सर्वेक्षणं देय्या आर्थिक किपाया बुलुगु चित्रण याःगु दु । सत्ताय् वइपिं सरकारतय्सं थःपिनि पालय् यक्व ज्या याना, व याना, थ्व याना धकाः तसकं बय्बय् याइ तर अन्तिमय् वनाः छु सी दइ धायेबलय् उमिसं याःगु छुं नं ज्याया लिच्वः धाःसा उलि बांलाःगु दइ मखु । गुगुं नं सरकारं तइगु आर्थिक लक्ष्य गबलें नं पूवंके फइ मखु । लक्ष्य पूवंसां हे आः झीत मगाये धुंकल । थज्याःगु अवस्थाय् लक्ष्य तक हे थ्यंके मफइगु आर्थिक गतिं झीत गनं नं थ्यंकी मखु । राजनीतिक क्रान्ति लिपा आर्थिक क्रान्ति याये धकाः सुरे जूपिं राजनीतिक पार्टीसं थुकी गम्भीर जुयाः बिचाः मयायेगु खःसा मेगु निद" प्यद" लिपा नेपाःया 'असफल राष्ट्र'या धलखय् झीसं चाहे मजूसां नं तयेत झी बाध्य जुइ माली ।

नेपाःया जःलाखःला देय् चीन व भारत आः विश्वया हे दकलय् गतिमान आर्थिक वृद्धि ज्वनाः न्ह्याः वनाच्वंगु दु । उमिगु आर्थिक प्रगति खनाः आः युरोप अमेरिकाया ध्यान तकं अन वनाच्वंगु दु । तर थज्याःगु इलय् नं नेपाः धाःसा शुन्य बराबरया आर्थिक वृद्धि ज्वनाः न्ह्याः वनाच्वंगु दु । सरकारतय्सं धायेगु यानाच्वंगु आर्थिक वृद्धिया सूचकांकयात तक नं पत्याः याये फइगु अवस्था मदु । छगू पार्टीं मेगु पार्टीत तथ्यांकया थासय् मिथ्यांक न्ह्यब्वल धकाः द्वपं बीगु यानाच्वंगु ला झीसं हे खंगु जुल ।

उकिं आया: ई तसकं लिबाये धुंकूगु दु । व सिबें दकलय् चिन्ताया विषय ला छु धायेबलय् देय् अवस्थाय् थ्यनेधुंकलं नं सत्ताय् वनीपिं राजनीतिक दलत गम्भीर मजूनि । थ्व नेपाःया लागिं छुं हे कथं स्वस्थकर मखु ।

More Stories Like this