कुहां वल सिमेन्टया भाः
येँ (सन्ध्या टाइम्स)/वर्षाया इलय् वा वयेगु शुरु जुइवं सिमेन्टया भाः नं कुहां वःगु खँ सिमेन्ट व्यापारीतय्सं धाःगु दु। वंगु जेठ महिनाया लिपांगु वालय् तक च्यासः तका थ्यनाच्वंगु सिमेन्ट छबोराया आः ७४५ तकां लाः वःगु दु।
व्यापारीतय् कथं वर्षाया इलय् निर्माण कार्य म्हो जुयाः भाः कुहां वःगु खँ धाःगु दुसा भाः कुहां वइगु ई अझं जारी जुइगु खँ नं नां कने चाहे मजूम्ह छम्ह व्यापारीं धाल ।
भदौ तकया दुने छबोरा सिमेन्टया भाः ७०० तका जुइगु खँ नं उम्ह व्यापारीं कंगु दु ।
बजारय् छबोरा सिमेन्टया भाः ७४५ तक खःसां नेशनल टे्रडिङ कर्पोरेशन व तारा गाउँ विकास समितिइ धाःसा ६५० तकां सिमेन्ट मियाच्वंगु खँ नं उम्ह व्यापारीं कंगु दु। तर थ्व निगुलिं सरकारी निकायं ६५० तकां मियाच्वंगु धाःसां नं अन सिमेन्ट धाःसा मदुगु जानकारी नं बिउगु दु ।
