सिडिओया ज्याकुथी ३०० मुद्दा
येँ (सन्ध्या टाइम्स)/ खाद्य तथा गुणस्तर विभागं येँय् थीथी खाद्य पदार्थय् जूगु मिसावटयात कयाः ३०० गू मुद्दात सीडीओ ज्याकुथी दर्ता यानातःगु खँ सीदुगु दु ।
खाद्य तथा गुणस्तर नियन्त्रण विभागया अधिकृत प्रमोद कोइरालाया कथं सर्वसाधारण जनतां बिउगु सुचंया आधार व विभागया हे फुड कन्ट्रोल डिर्पामेन्टया ग्वाहालिं थीथी थासय् जुयाच्वंगु मिसावटया अध्ययन यानाः लुइकूगु प्रमाणया आधारय् थ्व मुद्दा दर्ता यानागु खँ नं वय्कलं कनादीगु दु।
तर वय्कलं कारवाहीलय् लाःगु कम्पनीया नां धाःसा कने चाहे मजू ।
थुकिया बारे 'सन्ध्या टाइम्स' लिसे खँ ल्हासें थःपिंसं मुद्दा सीडीओ कार्यालयय् दर्ता याये धुनागुलिं अन हे सम्पर्क यायेत सुझाव बियादिल ।
थ्व सम्बन्धय् सीडीओ कार्यालयया मुद्दा फाँटय् नं सम्पर्क तयागु खःसां नं मुद्दा फाँटया अधिकृतं जानकारी थम्हं बी मछिं धासें सीडीओयात हे स्वापू तयेत सुझाव बियादिल।
उखे बजारय् आपालं मिसावट जुयाच्वंसां थःपिंसं तप्यंक कारवाही यायेगु अधिकार मदुगुलिं बजारय् अखाद्य बस्तु मिसावट जुयाच्वंगुयात नियन्त्रण काये मफुगु खँ विभागया अधिकृत कोइरालां धयादीगु दु। उकिया निंतिं थःपिंत नं छुं अधिकार माः धकाः कुतः यानाच्वनागु जानकारी नं वय्कलं बियादिल ।
