धर्मचक्र प्रवर्तन दिवसया लसताय् मिखा शिविर
ख्वप (सन्ध्या टाइम्स)/ २५९८ क्वःगु धर्मचक्र प्रवर्तन दिवसया लसताय् युवा बौद्ध पुचः ख्वप, तिलगंगा आँखा प्रतिष्ठान येँ व भक्तपुर सामुदायिक आँखा केन्द्रया ग्वसालय् मुनिबिहार इनाचोय् मिखा शिविर जुल। उगु शिविरया उलेज्या भिक्षु थानसोथापाखें यानाबिज्याःगु खः। पुचःया दुजः प्रताप मानन्धरं लसकुस यानाः न्ह्याःगु शिविरय् तिलगंगा आँखा प्रतिष्ठानपाखें शंखनारायण त्वाय्नां मिखा दानया महत्व बारे कनादिल।
पुचःया नायः धर्मरत्न शाक्यया सभापतित्वय् न्ह्याःगु शिविरय् ७०० म्हेसिया मिखा परीक्षण याःगु खः। उकि मध्ये नीन्हय्म्हेसिया मिखाया अप्रेशन यायेमाःगु खःसा वय्कःपिंत तिलगंगा आँखा प्रतिष्ठानं सितिकं अप्रेशनया व्यवस्था याइगु जूगु दु।
