कुलांभुलुया सतः जीर्णोद्धार न्ह्यात

येँ (सन्ध्या टाइम्स)/येँ महानगरपालिका १८ वडाया टोल सुधार समितिया ग्वसालय् थनया कुलांभुलु (रक्तकाली) देगः व जःखःया सतः जीर्णोद्धार जुयाच्वंगु दु।
उगु सतः जीर्णोद्धारया निंतिं इन्जिनियर मोहनकृष्ण डंगोलया संयोजकत्वय् झिंन्याम्ह दुजः दुगु छगू उपभोक्ता समिति दयेकाः ज्या न्ह्याकूगु दु। मुक्कं नीछगू लाख दां फ्यानाः श्रद्धालु भक्तजन व समाजसेवीपिंके आर्थिक ग्वाहालि कयाः उगु सतःया जीर्णोद्धार यायेत्यंगु खँ धाःगु दु।
सतः दयेकेत फुपिंसं फुकथं ग्वाहालि यायेत समितिया दुजः महेन्द्र शाहीं इनाप यानादिल। आः तक उगु ज्या शुरु यायेत न्यागू लाख दां मुंके धुंकूगु खँ उपभोक्ता समितिं धाःगु दु।