माओवादीं बजेट पारित जुइमबीगु
प्रमुख प्रतिपक्षी दल एकीकृत नेकपा (माओवादीं) सरकारं न्ह्यब्वःगु बजेट पारित जुइमबीगु ख्याच्वः ब्यूगु दु ।
माओवादीया वरिष्ठ नेता व पुलांम्ह अर्थमन्त्री डा. बाबुराम भट्टराईं बुधवाः माओवादी संसदीय दलया ज्याकूथी पत्रकार सम्मेलन यानाः बजेटयात माओवादीं सैद्धान्तिक खारेज याःगुलिं थुकीयात पारित जुइ मबीगु दाबी यानादिल ।
मंकाः सरकारया बारे आन्तरिक सहलह जुयाच्वंगु जानकारी बियादिसें नेता भट्टराईं राष्ट्रिय सरकार गठनलिपा जक बजेट ह्येगु नं धयादिल । एमाले नेतृत्वया सरकारं हःगु बजेटयात कांग्रेसं नं विरोध याःगुलिं थुकीया औचित्य मदुगु वयेकलं धयादिल ।
बजेटं न्हापाया हे पहयात निरन्तरता ब्यूगु धासें नेता भट्टराईं संविधानसभाया दकलय् तःधंगु दल माओवादी नाप बजेटया विषयस छक्व नं सहलह मयाःगु धयादिल ।
बजेटयात समुद्रय् तंगु पानी जहाजया संज्ञा बियादिसें वयेकलं बजेटय् औपनिवेशिक व नवऔपनिवेशिक धारणा दुगु धयादिल । डा. भट्टराईं बजेटय् अवैध ढंग सम्पत्ति मुंकूपिंत प्रोत्साहन याःगु द्वपं बियादिल ।
