निलम्बित गभर्नर भट्टराईयात सफाई
सर्वोच्च अदालतं नेपाल राष्ट्र बैंकया तत्कालीन गभर्नर विजयनाथ भट्टराई व कार्यकारी निर्देशन सुरेन्द्र प्रधानं भ्रष्ट्राचार मयाःगु धासें सफाई ब्यूगु दु ।
वित्तीय क्षेत्र सुधार ज्याझ्वः अन्तर्गत नेपाल राष्ट्र बैंकया सुपरिवेक्षण यायेगु ज्याय् विदेशी परामर्शदाता झिकेयाःगु ईलय् भ्रष्ट्राचार याःगु धासें अख्तियार दुरुपयोग अनुसन्धान आयोगं भट्टराई व प्रधानयात २०६४ असार १५ गते भ्रष्ट्राचारया मुद्दा दर्ता याःगु खः ।
सर्वोच्च अदालतया एकल इजलासं दोषि ठहर यायेवं सर्वोच्चय् दायर याःग पुनारावलोकन मुद्दां बुधवाः सफाई ब्यूगु खः । सफाई लिपाः भट्टराई स्वतः गभर्नर जुयादीगु जूगु दु । सर्वोच्च अदालतया न्यायाधिस ताहिर अली अन्सारीया एकल इजलासं भट्टराई व प्रधान निम्हेसनं भ्रष्ट्राचार याःगु ठहर लिपाः उमिसं पुनरावलोकन निवेदन ब्यूगु खः ।
बुधवा: सर्वोच्च अदालतया न्ययाधिस खिलराज रेग्मी व प्रेम शर्माया इजलासं बदनियत मदुगु, असल नियतं याःगु ज्यायात भ्रष्ट्राचार धाये मफइगु व भुक्तानी जूगु ध्यबा लित वःगु धासें सफाई ब्यूगु खः ।
अख्तियार दुरुपयोग अनुसन्धान आयोगं विश्व बैंकया ऋण ग्वाहालिलय् संचालित नेपाल राष्ट्र बैंकया पुर्नसंरचना परियोजना अन्तर्गत श्रीलंकाया केपिइमजी कन्सल्टेन्सीयात ब्यूगु ५१ ह्जार ५३८ डलर भुक्तानीलय् भ्रष्ट्राचार याःगु धासें भट्टराई व कार्यकारी निर्देशक सुरेन्द्र प्रधान विरुद्ध मुद्दा दायर याःगु खः ।
