सत्तारुढ दलया सभासदतय्सं हे बजेट कार्यान्वयन जुइगु खँय् आशंका व्यक्त
सरकारं सोमवाः आर्थिक दँ २०६६/६७ या निंतिं पेश याःगु बजेटया बारे सत्तारुढ दलया नेतातय्सं हे बजेट कार्यान्वयन जुइगु खँय् आशंकाः प्वंकूगु दु ।
मंगलवाः व्यवस्थापिका संसदय् बजेट उपर जूगु सहलहलय् सत्तारुढ दलया नेतातय्सं बजेट जनमुखी जुसां यक्व कमिकमजोरी दुगु धासें कार्यान्वयन याये थाकूइगु खँ धाःगु खः । महंगी नियन्त्रण जुइमफुगु व स्थानीय निकाय गठन जुइमफुगुलिं बजेट कार्यान्वयन जुइगु खँय् नेतातय्सं आशंका प्वंकूगु खः ।
सहलहस सत्तारुढ दल मध्ये नेपाली कांग्रेसया सभासद् व पुलांम्ह अर्थमन्त्री डा. रामशरण महत, तराई-मधेश लोकतान्त्रि पार्टीया हृदेशकुमार गुप्ता, जनशक्ति पार्टीया सहअध्यक्ष व पुलांम्ह अर्थमन्त्री डा. प्रकाशचन्द्र लोहनी व सद्भावनाया अनिलकुमार झां बजेट कार्यान्वयन जुइमफइगु बीचाः प्वंकादीगु खः ।
नेकपा (एमाले)या सभासद् विजयकुमार पौडेलं धासाः बजेटया बचाउ यासें बजेट समाजवाद पाखे उम्मुख जूगुलिं समग्र समाज व निम्न स्तरया समुदाययात ग्वाहालि जुइगु धयादिल ।
एकीकृत नेकपा (माओवादीं) धासां सहलहलय् ब्वति मकाः । संसद न्ह्यायेवं माओवादीया सभासद् खीमलाल देवकोटां असंवैधानिक सरकारं हःगु बजेटय् सहलह मयायेगु खँ धयादीगु खः । वयेकलं सरकारं सेनायात बजेट अप्वयेकूगु खँय् आपत्ति नं प्वंकादीगु खः । वयेकलं बजेटय् बुँदागत सहलह यानाः थःपिनिगु ई सितिं मछ्वेगु धायेवं माओवादी सभासद्तय्सं सहलह बहिष्कार यानाः पिहांवंगु खः ।
